पद भरतीमध्ये गैरप्रकार झाल्यास कारवाई

पालघर, ता. १३ (बातमीदार) : पालघर जिल्हा परिषदेच्या आरोग्य विभागामध्ये कंत्राटी पद्धतीने कर्मचाऱ्यांची भरती प्रक्रिया सुरू आहे. या भरती प्रक्रियेत गैरव्यवहार सुरू असल्याची बाब समोर आलेली आहे. उमेदवाराकडून नियुक्तीपत्र देताना व मुलाखतीदरम्यान २५ हजार रुपयांची मागणी केली जात असल्याचे निदर्शनास आले होते. जिल्हा परिषदेचे अध्यक्ष प्रकाश निकम यांना ही माहिती समजल्यानंतर भरतीदरम्यान गैरव्यवहार केला असल्यास संबंधितावर त्वरित कारवाई करण्यात येईल व भरतीचा ठेका रद्द केला जाईल, असे स्पष्ट केले आहे.
आरोग्य विभागामध्ये ५०० कंत्राटी कर्मचाऱ्यांची पदे मंजूर झाली आहेत. ही भरती करताना ज्या उमेदवाराकडे पैशाची मागणी केली असेल, त्या उमेदवाराने निनावी पत्र किंवा फोन केला तरीदेखील संबंधित अधिकारी अथवा कर्मचाऱ्यावर कारवाई करण्यात येणार आहे. तसेच ठेकेदाराचा ठेका रद्द केला जाईल, असे ठणकावून सांगितले. तसेच उल्लेख केल्याप्रमाणे ज्या पदाधिकाऱ्यांच्या स्वीय सहायकाने अथवा कोणाही अधिकारी किंवा पदाधिकाऱ्याने अशा प्रकारची मागणी केल्यास उमेदवार निनावी पत्र किंवा फोनद्वारे कळवू शकतात, असे आवाहन जिल्हा परिषद अध्यक्ष यांनी केले आहे.

---------------------
५०० जागांसाठी भरती
पालघर जिल्ह्यात आरोग्य विभागासाठी ५०० जागांसाठी भरती प्रक्रियेची प्रक्रिया सुरू आहे. बहुउद्देशीय स्त्री व पुरुष आरोग्य कर्मचारी पदासाठी ४४० व औषध निर्माण अधिकारी पदासाठी २५ आणि प्रयोगशाळा तंत्रज्ञ पदासाठी २४ जागा आहेत. या भरती प्रक्रियेमध्ये सर्व निकष पूर्ण करून मुलाखतीमध्ये उत्तीर्ण झालेल्या उमेदवारांना जिल्ह्यातील प्राथमिक आरोग्य केंद्र, उपकेंद्र, आयुष्य दवाखाने अशा ठिकाणी नियुक्ती केली जाणार आहे. यासाठी १५ हजार रुपयांच्या जवळपास मानधन देण्यात येणार आहे.