नवी मुंबईत नो पार्किंगची समस्या

जुईनगर, ता. २२ (बातमीदार) ः नवी मुंबई शहरात पार्किंगचे योग्य नियोजन नसल्याने दिवसेंदिवस वाहतूक कोंडीची समस्या शहरात वाढताना दिसून येत आहे. नवी मुंबईत वाशी, सानपाडा, जुईनगर, नेरुळ, आशा अनेक क्षेत्रामध्ये पार्किंग, नो पार्किंग झोन केले आहेत. पण, कुठेही, कशाही पद्धतीने वाहचालक बेकायदेशीर पार्किंग करत असल्याचे दिसत आहे. पालिकेने नागरिकांसाठी दुचाकी, चारचाकी वाहनांच्या पार्किंगची सोय करून दिली असली तरी सानपाडा, जुईनगर व नेरुळ रेल्वे स्थानक परिसरात मोठ्या प्रमाणावर नो पार्कींग क्षेत्रात दुचाकी वाहने उभी केली जात आहेत. या वाहनांवर वाहतूक पोलिसांकडून दुर्लक्ष केले जात असल्याचे दिसून येत आहे.

नवी मुंबई शहरात लोकसंख्या वाढत असल्याने वाहनांची संख्याही मोठ्या प्रमाणात वाढताना दिसत आहे. नियोजबद्ध शहर म्हणून नवी मुंबई शहराची गणना होत असली तरी दिवसेंदिवस नो पार्कींगमध्ये दुचाकी, चारचाकी वाहने रस्त्यावर येत आहेत. शहराबाहेरून शहरात येणाऱ्या वाहनांची संख्याही मोठ्या प्रमाणात आहेत. त्यामुळे रस्त्यावर वाहनांची गर्दी सतत वाढती आहे. रस्याच्या कडेला बेकायदा पार्किंग होऊ नये यासाठी वाहने पार्किंगकरिता शहरातील जागा निश्चित करून पार्किंग, नो पार्किंग झोन निश्चित केले आहेत. मात्र, जिथे नो पार्किंगचे बोर्ड आहेत तिथेच वाहने पार्क केली जातात. या झोनची अंमलबजावणी नीट होताना दिसत नाही. शहरात वाढती लोकसंख्या आणि पार्किंगचे नियोजन नसल्याने याचा ताण वाहतूकीवर पडताना दिसत आहे. त्यात वाहतूक पोलिस देखील अशा वाहनांकडे दुर्लक्ष करत आहेत.

नो पार्किंगमध्ये वाहने लावल्यास वाहनांवर कारवाई करण्याचे काम वाहतूक पोलिस करतात. मुख्य रस्त्यांवर बेकायदा पार्किंग होत असल्याने वाहतूक कोंडी होत असून गोंधळ होत आहे.
मुख्य रस्त्याजवळ असलेली दुकाने, शोरूम, हॉटेल, बियर बारसह कार्यालयांमध्ये येणारे लोक तिथेच दुचाकी, चारचाकी वाहने पार्क करतात. बाजार क्षेत्रातील परिसरात देखील नो पार्किंगची समस्या गंभीर आहे. महापालिकेच्या वतीने नो पार्किंगचे फलक लाऊनही काही नागरिक या नियमांचे उल्लंघन करत असून वाहतूक पोलिसांची कारवाईदेखील मंदावलेली पाहायला मिळत आहे. नियमांचे उल्लंघन करून वाहणे पार्क करणाऱ्यांवर तात्काळ कारवाई करण्याची मागणी नागरिक करत आहेत.