सभेला गैरहजर राहिल्याने दोन ग्रामसेवक निलंबित

मुरबाड, ता. २९ (बातमीदार) : ठाणे जिल्हा परिषदेच्या मुख्याधिकाऱ्यांनी बोलावलेल्या बैठकीला गैरहजर राहणाऱ्या आणि त्यासंबंधी खुलासा न करणाऱ्या मुरबाड तालुक्यातील दोन ग्रामसेवकांना मुरबाड पंचायत समितीच्या गटविकास अधिकारी यांनी निलंबित केले आहे. बळेगाव ग्रामपंचायतीचे ग्रामसेवक कांताराम नाईगडे व टोकावडे ग्रामपंचायतीचे ग्रामसेवक जगदीश सूर्यवंशी यांना निलंबित करण्यात आले आहे. मुरबाड पंचायत समितीच्या गटविकास अधिकारी श्वेता पालवे यांनी आदेश जारी केला. ठाणे जिल्हा परिषदेचे मुख्याधिकारी यांनी आयोजित केलेल्या विशेष सभेस दोघे ग्रामसेवक उपस्थित राहिले नाहीत, तसेच त्याबाबत खुलासासुद्धा केला नाही, त्यामुळे त्यांच्यावर कारवाई करण्यात आल्याचे सांगण्यात आले.