रिक्षाचालकांच्या मुजोरीचा मनस्ताप

घणसोली, ता. १ (बातमीदार)ः रेल्वे स्थानकासमोर रिक्षाचालकांची मुजोरी दिवसेंदिवस वाढतच आहे. रात्रीच्या वेळी या परिसरात दुहेरी रिक्षा पार्किंग होत असल्याने दररोज कोंडी होत असल्याचे चित्र आहे. त्यामुळे प्रवाशांवर कोंडीतूनच मार्गस्थ होण्याची वेळ आली आहे.
घणसोली रेल्वे स्थानकाच्या समोर प्रवाशांची मोठी रेलचेल सुरू असते. रेल्वे स्थानकात जाणारे-येणारे प्रवासी तसेच वाहनचालकांमुळे वारंवार गजबजलेला परिसर पाहायला मिळतो; मात्र या परिसरात बेकायदा रिक्षा स्टँड सुरू करण्यात आला असून रात्रीच्या वेळेस येथे दुहेरी पार्किंग केले जात आहे. त्यामुळे या ठिकाणी प्रवाशांना चालण्यासाठी जागा नसल्याने कोंडी होत असल्याचे चित्र आहे; तर या रिक्षांमुळे महापालिकेच्या बसला वळण घेताना अडचणी येत असल्याने कोंडीत अधिकच भर पडत आहे. त्यामुळे काही सेकंदांचा रस्ता पार करण्यासाठी अनेक मिनिटे कोंडीमध्ये वाहनचालकांना उभे राहावे लागत आहे. विशेष म्हणजे या दुहेरी पार्किंगमध्ये उभ्या करण्यात आलेल्या वाहनांवर कारवाई केली जात नसल्याने बेशिस्त वाहनचालकांमुळे प्रवासी वेठीस धरले जात आहेत.
----------------------------------------
अल्पवयीन रिक्षाचालकांचा वावर
अनेक रिक्षाचालकांकडे परवाना, गणवेश नसतानाही ते या ठिकाणी व्यवसाय करत आहेत. तसेच अनेकदा काही रिक्षाचालक नशा करून प्रवाशांना नाहक त्रास देत आहेत; तर रात्रीच्या वेळी अल्पवयीन रिक्षाचालक असल्याने वाहतूक नियमांचे सर्रासपणे उल्लंघन केले जात आहे.
-------------------------------------------
घणसोली विभागात वारंवार वाहतूक विभागाच्या वतीने कारवाई केली जाते. यासाठी विशेष पथकाचीदेखील नियुक्ती केली आहे; मात्र तरीही रिक्षाचालकांकडून वाहतूक नियमांचे उल्लंघन करण्याचे प्रकार सुरू आहेत.
- विश्वास भिंगारे, सहायक पोलिस निरीक्षक, कोपरखैरणे वाहतूक विभाग
-----------------------------------
घणसोली रेल्वे स्थानकासमोर प्रवाशांमुळे अगोदरच वाहतूक कोंडी असते. त्यात मनमानी पद्धतीने दुहेरी पार्किंग करून रिक्षाचालक प्रवाशांना वेठीस धरत आहेत.
- मनोज बोबडे, प्रवासी