मरगळी तलाव रस्ता विकसित करण्याची मागणी

भाईंदर, ता. १ (बातमीदार) : उत्तन परिसरातील चवळी भागात असलेल्या मरगळी तलावालगतचा विकास आराखड्यातील रस्ता विकसित करण्याची मागणी नागरिकांनी केली आहे. या परिसरात शेती, तसेच प्रार्थनास्थळ असल्यामुळे हा रस्ता विकसित केल्यास त्याचा मोठा लाभ होणार आहे, असे नागरिकांचे म्हणणे आहे. यासंदर्भात माजी आमदार गिल्बर्ट मेन्डोन्सा यांच्यासह नागरिकांच्या शिष्टमंडळाने आयुक्त दिलीप ढोले यांची नुकतीच भेट घेऊन त्यांना निवेदन सादर केले.

उत्तन-गोराई रस्त्यालगत चवळी येथे सुमारे शंभर वर्षे जुना मरगळी तलाव आहे. या परिसरात शेती असून तलावाचे पाणी शेती आणि बागांसाठी वापरण्यात येते. तसेच संत अंथोनी समाजमंदिरातही त्यांचे जाणे-येणे सुरू असते. मात्र तलावालगत असलेली सरकारी जमीन काही वर्षांपूर्वी ज्युडीशियल अकादमीला देण्यात आली. त्याठिकाणी न्यायाधीशांसाठी प्रशिक्षण केंद्र निर्माण करण्यात आले आहे. त्यामुळे तलाव व समाजमंदिराकडे जाणारे सर्व रस्ते बंद करण्यात आले आहेत. त्यामुळे नागरिकांना शेती आणि समाजमंदिराकडे जाण्यासाठी फार मोठा वळसा घालून जावे लागते.

मिरा-भाईंदरच्या विकास आराखड्यात मरगळी तलावाच्या पूर्व किनाऱ्यावर नियोजित रस्ता दर्शवण्यात आला आहे. हा रस्ता महापालिकेने विकसित करून दिलासा द्यावा, अशी मागणी माजी आमदार गिल्बर्ट मेन्डोन्सा, धारावी बेटाचे डीन फादर पीटर डिकुन्हा यांच्या नेतृत्वाखालील शिष्टमंडळाने आयुक्त दिलीप ढोले यांना दिले आहे.