महिलेला २४ लाखांचा गंडा

ठाणे, ता. १ (वार्ताहर) : ऑनलाईन टास्क बेस्ड जॉबद्वारे अधिक पैसे कमावण्याचे प्रलोभन दाखवून चितळसर परिसरात राहणाऱ्या २९ वर्षीय महिलेला दोन पुरुष आणि दोन महिलांनी तब्बल २४ लाख २९ हजार १३९ रुपयांचा गंडा घातला. फसवणूक झालेल्या महिलेने याप्रकरणी चितळसर पोलिस ठाण्यात तक्रार दाखल केली. चितळसर पोलिस आरोपींचा शोध घेत आहेत. फिर्यादी महिला ही नोकरदार आहे. या महिलेला दोन पुरुष आणि दोन महिलांनी मोबाईलवर मेसेज करून ऑनलाईन टास्क बेस्ड जॉबद्वारे अधिक पैसे कमावण्याचे प्रलोभन दाखवले. अधिक कमाई करण्यासाठी फिर्यादी महिलेला २४ लाख २९ हजार १३१ रुपयांची रक्कम ऑनलाईन पद्धतीने टप्प्याटप्प्याने पाठवण्यास भाग पाडले. त्यानंतर फसवणूक झाल्याचे लक्षात येताच चितळसर पोलिस ठाण्यात चार जणांविरोधात महिलेने तक्रार दाखल केली.