गृहनिर्माण संस्थांची मुंबईत परिषद

मुंबई, ता. २ ः मुंबई जिल्हा हौसिंग फेडरेशन आणि मुंबई जिल्हा मध्यवर्ती सहकारी बँकेच्या वतीने मुंबईत १३ व १४ मे रोजी सहकारी गृहनिर्माण संस्थांच्या दोन दिवसांच्या भव्य परिषदेचे आयोजन करण्यात आले आहे. यात अनेक महत्त्‍वाच्या विषयांवर चर्चा होईल.
भाजप विधान परिषद गटनेते आणि मुंबई जिल्हा बँकेचे अध्यक्ष आमदार प्रवीण दरेकर यांनी ही माहिती दिली. या परिषदेत वेगवेगळ्या विषयांवर चर्चा होईल व काही ठरावही मंजूर होतील. उद्‌घाटनाच्या सत्रात डीम्ड कनव्हेयन्स या विषयावर चर्चा होईल. शासनाने डीम्ड कन्व्हेयन्सची तरतूद केली, परंतु आजही डीम्ड कन्व्हेयन्स होत नाही. यासंदर्भातील अडचणींवर चर्चा होईल आणि राज्याचे गृहनिर्माणमंत्री काही निर्णय घेतील, अशी अपेक्षा असल्याचेही दरेकर म्हणाले.
स्वयंपुनर्विकास या महत्वाच्या विषयावरही या वेळी सखोल माहितीपूर्ण चर्चा होईल. परिषदेचे उद्‍घाटन उपमुख्यमंत्री देवेंद्र फडणवीस यांच्या हस्ते होईल; तर समारोप सत्राला मुख्यमंत्री एकनाथ शिंदे, विधानसभेचे विरोधी पक्षनेते अजित पवार भाजप आमदार आशिष शेलार आदी मान्यवर उपस्थित राहतील.

गृहनिर्माण संस्थांच्या विविध प्रश्नांबाबत राज्याचे सहकार आयुक्त मार्गदर्शन करतील. सहकारमंत्री अतुल सावे यांच्या अध्यक्षतेखाली होणाऱ्या परिसंवादात सहकार सचिव अनुप कुमार, नगरविकास सचिव भूषण गगराणी आदी हजर असतील. सहकार आणि नगरविकास विभागाशी संबंधित विषयांवरही चर्चा होईल. तसेच महसूलमंत्री विखे-पाटील यांच्या उपस्थितीत जमीन हस्तांतरण, एनए टॅक्स आदी विषय चर्चीले जातील.
- प्रवीण दरेकर, आमदार

परिषदेत याही गोष्‍टी
परिषदेच्या पहिल्या दिवशी विविध प्रकारच्या स्टॉलचे प्रदर्शन, हौसिंग फेडरेशनची माहिती देणारे स्टॉल, वेगवेगळ्या प्रकारचे सेल्फ डेव्हलपमेंटचे स्टॉल तसेच या परिषदेशी पूरक असणारे माहितीपूर्ण स्टॉल उभारले जातील.