अखेर अंबरनाथमधील अग्निशमन केंद्र सुरू

अंबरनाथ, ता. ६ (बातमीदार) : अंबरनाथच्या पूर्व भागातही नगरपालिकेचे अग्निशमन केंद्र तात्पुरत्या स्वरूपात सुरू करण्यात आले आहे. पश्चिमेकडे पालिकेचे सुसज्ज अग्निशमन केंद्र आहे, मात्र पूर्व भागात आगीच्या घटना घडल्यास त्यावर त्वरित नियंत्रण मिळवण्यासाठी पूर्व भागात अग्निशमन केंद्र असावे, अशी मागणी जोर धरत होती. महाराष्ट्र दिनी पूर्वकडील प्राचीन शिव मंदिरासमोरील मोकळ्या पटांगणात मुख्याधिकारी डॉ. प्रशांत रसाळ, अतिरिक्त मुख्याधिकारी डॉ. प्रशांत शेळके यांच्या हस्ते अग्निशमन दलप्रमुख डॉ. भागवत सोनोने यांच्या उपस्थितीमध्ये हे उपकेंद्र सुरू करण्यात आले. या केंद्रात एक वाहन आणि १५ कर्मचारी यांची नियुक्ती करण्यात आले आहेत. या केंद्राबाबत ‘सकाळ’मध्ये वृत्त प्रसिद्ध झाले होते.