शहर कचरा मुक्त करणे हेच उद्दीष्ट : दांगडे

कल्याण, ता. ६ (बातमीदार) : कल्याण- डोंबिवली शहरे पूर्णपणे कचरा मुक्त करणे हेच आपले उद्दिष्ट असेल पाहिजे, असे प्रतिपादन महापालिका आयुक्त डॉ.भाऊसाहेब दांगडे यांनी केले. महापालिका मुख्यालयाजवळील सुभाष मैदान येथे घनकचरा व्यवस्थापन विभागाच्या ४३ घंटा गाड्यांचे (स्वच्छ भारत मिशन १ मधून) लोकार्पण करतेवेळी ते बोलत होते. या गाड्यांबरोबरच आपण १३ मोठे रिफ्युज कॉम्पॅक्टर खरेदी करत आहोत त्याच बरोबर ४ मेकॅनिकल पॉवर स्विपर (स्वच्छ भारत मिशन २ मधून) आणि धुळ नियंत्रण ठेवण्यासाठी २ फॉगिंग मशिन पर्यावरण प्रदूषण नियंत्रण विभागाच्या, पंधराव्या वित्त आयोगाच्या निधी मधून खरेदी करत आहोत, अशी माहिती त्यांनी यावेळी दिली. यावेळी घनकचरा व वाहन विभागाचे उपायुक्त अतुल पाटील, महापालिका सचिव संजय जाधव, स्वच्छ भारत मिशन अभियानाचे महापालिकाचे ब्रॅन्ड ॲम्बसेडर डॉ. प्रशांत पाटील, कार्यकारी अभियंता प्रवीण प्रवार, सहा.आयुक्त हेमा मुंबरकर, दिनेश वाघचौरे, संजयकुमार कुमावत,भरत पाटील, उपमुख्य स्वच्छता अधिकारी घुटे आदी उपस्थित होते.