ठाण्यात अल्पवयीन मुलीवर अत्याचार

ठाणे, ता. ६ (वार्ताहर) : शहरातील माजिवडा परिसरामध्ये राहणाऱ्या एका साडेसहावर्षीय मुलीवर एका ५५ वर्षीय व्यक्तीने अत्याचार केल्याची घटना सोमवारी दुपारी घडली. याप्रकरणी कापूरबावडी पोलिस ठाण्यात आरोपीविरोधात गुन्हा दाखल करण्यात आला असून पोलिसांनी आरोपीला मुंबईच्या माहीम येथून अटक केली. तसेच आरोपी व्यवयायाने मिस्त्री असून तो बाळकुम परिसरात राहतो. आरोपी पीडितेच्या शेजारी राहत असल्याने आरोपीचे पीडित मुलीच्या घरी येणे-जाणे होते. सोमवारी दुपारी दीडच्या सुमारास आरोपीने पीडित मुलीच्या घरी जाऊन तिच्यावर अत्याचार केला आणि तेथून पलायन केले. हे प्रकरण पीडित मुलीच्या घरच्यांना समजल्यावर त्यांनी कापूरबावडी पोलिस ठाण्यात तक्रार केल्यानंतर पोलिसांनी तत्काळ आरोपीचा शोध सुरू केला. आरोपी चुरका शरन उर्फ दादू हा पश्चिम बंगालमध्ये पळून जाण्याच्या तयारीत असतानाच पोलिसांनी त्याला बेड्या ठोकल्या. पोलिसांनी त्याला मुंबईच्या माहीम या परिसरातून अटक केली. आरोपीविरोधात पोक्सोअंतर्गत गुन्हा दाखल करण्यात आला असून पुढील तपास पोलिस करत आहेत.