अयोध्या पोळ यांच्यावर शाईफेक

कळवा, ता. १६ (बातमीदार) : शिवसेना ठाकरे गटाच्या सोशल मीडिया राज्य समन्वयक आयोध्या पोळ यांच्यावर शाईफेक करण्यात आली. कळव्यातील जयभिमनगर परिसरात शुक्रवारी (ता १६) ला रात्री ९ च्या सुमारास ही घटना घडली.
कळव्यातील जयभिमनगर येथे शुक्रवारी सायंकाळी पुण्यश्लोक अहिल्याबाई होळकर यांची जयंती साजरी करण्यात येणार आहे. या कार्यक्रमासाठी खासदार राजन विचारे, शिवसेना उपनेत्या सुषमा अंधारे उपस्थित राहणार आहेत. मी कळव्यातील शिवसेना ठाकरे गटाची पदाधिकारी बोलत असून आपण उपस्थित राहावे, असे खोटे आमंत्रण शिवसेना ठाकरे गटाच्या महिला राज्य समन्वयक आयोध्या पोळ यांना देण्यात आले. पोळ घटनास्थळी आल्यावर त्यांना घेराव घालून त्यांच्यावर शाईफेक व त्यांना धक्काबुक्की करत मारहाण करण्याची घटना घडली. या संदर्भात पोळ यांनी या घटनेमागे शिंदे गटाचे शिवसैनिक असल्याचा आरोप करत कळवा पोलिस ठाण्यात शुक्रवारी रात्री पोळ व कळव्यातील ठाकरे गटाच्या पदाधिकाऱ्यांनी तक्रार दाखल केली आहे. दरम्यान, पोळ यांच्यावर शाईफेक व धक्काबुक्कीची घटना घडल्याचे वृत्त समजताच ठाकरे गटाच्या शिवसैनिकांनी कळवा पोलिस ठाण्यात गर्दी केली; तर पोळ यांनी शिंदे गटावर या घटनेचा आरोप केल्याने शिंदे गटाचे शिवसैनिक पोलिस ठाण्या समोर जमा झाल्यावर तेथेही शाब्दिक चकमक झाली.