कल्याणमध्ये बेशिस्त वाहन चालकांना दणका

कल्याण, ता. १८ (बातमीदार) : कल्याण-डोंबिवलीतील बेशिस्त वाहनचालकांच्या विरोधात वाहतूक पोलिसांची धडक मोहीम सुरू असून, कल्याण पूर्व कोळशेवाडी वाहतूक पोलिसांनी लोढा पलावा, काटई, बदलापूर चौक या ठिकाणी वाहतूक विभागाने फ्लॅश डिप्लॉयमेंट करून मोटार वाहन कायदा अंतर्गत विविध कलमान्वये बेशिस्त वाहन चालकांच्या विरोधात कारवाई केली. यात विनाहेल्मेट ७२, विनासीटबेल्ट २२, सिग्नल मोडणे ९०, काळ्या काचा ६, गणवेश न घालणे ११ अशा एकूण ३६७ वाहनचालकांवर कारवाई करून चार लाख १५ हजार ९०० रुपये इतका दंड आकारण्यात आला असून त्यापैकी १९ हजार १०० रुपये दंड जागीच वसूल करण्यात आला आहे. या मोहिमेत कोळसेवाडी वाहतूक विभागाचे तीन अधिकारी, दहा पोलिस अंमलदार आणि दहा वॉर्डन, तसेच डोंबिवली उपविभागाचे दोन अंमलदार व कल्याण उपविभागाचे दोन पोलिस अंमलदार असे एकूण तीन अधिकारी, १२ अंमलदार, १० वॉर्डन यांचा समावेश होता. या कारवाईदरम्यान वाहतूक नियमांचे उल्लंघन करणाऱ्या वाहनचालकांनी मोटार वाहन नियमांचे पालन करण्याची माहिती देणारे फलक दाखवून जनजागृतीसुद्धा केली, अशी माहिती वाहतूक विभाग वरिष्ठ पोलिस निरीक्षक रवींद्र क्षीरसागर यांनी दिली.