गोखले उड्डाणपूल पूर्णत्‍वाकडे

गोखले उड्डाणपूल पूर्णत्‍वाकडे
दोन मार्गिका नोव्हेंबरमध्ये सुरू होणार; पालिकेचा विश्‍वास
सकाळ वृत्तसेवा
मुंबई, ता. १८ ः अंधेरी पूर्व-पश्चिमेला जोडणाऱ्या गोपाळकृष्ण गोखले रेल्वे उड्डाणपुलाच्या कामाची वाटचाल पूर्णत्वा‍कडे होत आहे. या पुलावरील किमान दोन मार्गिका ऑक्टोबरअखेर आणि संपूर्ण पूल डिसेंबरअखेरपर्यंत सुरू करण्याच्या दृष्टीने आम्ही काम करीत आहोत, अशी माहिती पालिका प्रशासनाने दिली आहे.
अंधेरीतील गोपाळकृष्ण गोखले रेल्वे उड्डाणपुलाचे बांधकाम पालिकेकडून करण्यात येत आहे. महापालिका आणि रेल्वे प्रशासन सर्व संबंधित यंत्रणांची योग्य समन्वय राखून वेगाने या प्रकल्पाचे काम पूर्ण व्हावे, यासाठी सातत्याने प्रयत्न करीत आहेत. या प्रकल्पाच्या गतीवर पालिका आयुक्त इक्बाल सिंह चहल, अतिरिक्त पालिका आयुक्त (प्रकल्प) पी. वेलरासू हे स्वतः लक्ष ठेवून आहेत. अतिरिक्त आयुक्त वेलरासू हे स्वतः प्रकल्पास नियमितपणे भेटी देऊन कामाचा आढावा घेत आहेत. प्रकल्पाच्या प्रगतीची वस्तुनिष्ठ माहिती प्रसारमाध्यमांच्या मदतीने जनतेपर्यंत पोहोचवली जात असल्‍याचे प्रशासनाकडून सांगण्यात आले आहे.

हजार टन वजनाच्या गर्डरचे काम सुरू
अंधेरी पूर्व-पश्चिमेला जोडणाऱ्या गोपाळकृष्ण गोखले रेल्वे उड्डाणपुलाचे बांधकाम वेगाने सुरू आहे. या प्रकल्पाच्या निर्मितीमध्ये सुमारे १ हजार २५० टन वजनाचा गर्डर महत्त्वाचा असणार आहे. या गर्डरसाठी १ हजार २७० मेट्रिक टन पोलाद (स्टील) खरेदी करण्यात आले आहे. एवढेच नव्हे, तर गर्डरची २५ टक्केपेक्षा अधिक जुळवाजुळव अंबाला येथील कारखान्यात पूर्ण झाली आहे. गर्डर बांधणीचे काम नियोजित वेळापत्रकानुसार सुरू असून ठरलेल्या वेळेत ते पूर्णदेखील होईल.

८० टक्‍के काम
पालिकेच्या हद्दीतील या पुलाच्या प्रवेश मार्गिकांचे तब्बल ८० टक्के काम देखील पूर्ण झाले आहे. उर्वरित कामदेखील लवकरच पूर्ण होईल. याचाच अर्थ गोखले पुलाचा पहिला टप्पा दोन मार्गिकांच्या रुपात ऑक्टोबरअखेर आणि संपूर्ण पूल डिसेंबरअखेर सुरू होईल, असे पालिकेने स्पष्ट केले आहे.

प्रशासनाची कटिबद्धता
अंधेरी पूर्व आणि पश्चिमेच्या वाहतुकीला अडचण येऊ नये म्हणून महानगरपालिका प्रशासनाने पर्यायी मार्ग सुरळीत राखले आहेत. भुयारी मार्गांमध्ये पावसाळ्यात पाण्याचा जलद गतीने निचरा व्हावा म्हणून पंपांची व्यवस्था केली आहे. तसेच पुलाचे काम वेगाने पूर्ण करण्यासाठी रेल्वे प्रशासन आणि इतर सर्व संबंधित यंत्रणांसोबत नियमित समन्वय राखला जात आहे. वेळापत्रकानुसार प्रकल्पाचे काम पूर्ण करण्यास प्रशासन कटिबद्ध आहे.