जोगेश्वरीत रेशन दुकानांत प्लास्टीक सदृश्य तांदूळ?

जोगेश्वरी, ता. ३ (बातमीदार) : दारिद्र्य रेषेखालील जीवन जगणाऱ्या नागरिकांना सरकारमार्फत मोफत धान्यपुरवठा करण्यात येतो; मात्र रेशन धान्य दुकानात मिळत असलेले धान्य निकृष्ट असल्याचे अनेकदा समोर आले आहे. आता जोगेश्वरीतील धान्य पुरवठा करणाऱ्या दुकानांत प्लास्टिक सदृश तांदूळ सापडल्याची घटना घडली आहे. त्यामुळे नागरिकांमध्ये संतापाची भावना निर्माण झाली आहे; मात्र याची माहिती मिळताच शिधावाटप अधिकाऱ्यांनी तांदळाचे नमुने तपासणीसाठी पाठवले आहेत. तसेच दोषींवर कारवाई करण्याचे आश्वासन दिले आहे.

जोगेश्‍वरी पूर्व येथील काही रास्त धान्य दुकानांत प्लास्टिक सदृश तांदूळ सापडल्याचा दावा केला जात आहे. यामुळे पुरवठा यंत्रणा सतर्क झाली आहे. हा तांदूळ जप्त करून तपासणीसाठी त्याचे नमुने पाठवण्यात आले आहेत. तांदळाच्या गोणीत काही प्रमाणात फोर्टीफाईड तांदूळ असतो. त्यामुळे सापडलेला हा तांदूळ प्लास्टिकचा आहे की फोर्टीफाईड तांदूळ आहे, याची खातरजमा केली जाणार आहे. जोगेश्‍वरी पूर्वच्‍या मेघवाडी येथील शिवम ट्रेडर्स रास्त धान्य दुकान क्रमांक यू-एमयूएम २६ ड १४१ तसेच इतर दुकानांमधून नागरिकांना वितरित केलेल्या तांदळात प्लास्टिक तांदूळ नुकतेच आढळून आले होते.

नागरिकांकडून भेसळीची माहिती माजी नगरसेवकांना मिळताच त्यांनी त्वरित साहायक शिधावाटप अधिकारी सुनील काकडे, संतोष म्‍हात्रे, सुहास जगताप, हेमंत परब यांच्‍या ही बाब निदर्शनास आणली. त्यानंतर दुकान क्रमांक २६ ड १४१ व दुकान क्र. ७३ मधील काही दुकानांत पाहणी केली. या पाहणीत भेसळयुक्‍त तादूळ वितरित होत असल्‍याचे आढळून आले. तसेच येथे वितरित होत असलेला गहू अन् तांदूळही निकृष्ट दर्जाचा असल्‍याची तक्रार नागरिकांकडून होत आहे. याबाबत नगरसेवक बाळा नर यांनी वितरित होत असलेले तांदळाचे वितरण त्वरित थांबवावे. तसेच पुरवठा करणाऱ्या ठेकेदारावर कडक कारवाई करावी अन् सर्व तांदळाच्‍या गोण्‍या बदलून द्याव्यात अशी मागणी केली. त्‍याप्रमाणे दोन्‍ही दुकानांतील प्‍लास्टिकयुक्‍त तांदूळ शिधावाटप अधिकाऱ्यांनी जप्‍त केले आहेत. तांदळाचे काही नमुने तपासणीसाठी पाठवण्यात आले आहेत. तसेच यात जे कोणी दोषी आढळतील त्यांच्यावर कडक कारवाई करणार असे आश्‍वासन दिले.