बंद दफनभूमीच्या मातीचे परीक्षण

बंद दफनभूमीच्या मातीचे परीक्षण
जिल्हा दंडाधिकारी करणार प्रकरणाचा तपास
चेंबूर, ता. ४ (बातमीदार) ः गोवंडी येथील देवनार व रफी नगर दफनभूमीत मातीचा दर्जा योग्य नसल्यामुळे या दफनभूमी बंद करण्यात आल्‍या आहेत. याबाबत ‘सकाळ’मध्ये बातमी प्रसिद्ध झाली होती. दरम्‍यान, याप्रकरणी जिल्हा दंडाधिकारी येथील मातीचे परीक्षण करणार आहेत. त्‍यानंतर या संदर्भातील अहवाल सादर केला जाईल आणि त्‍यानंतर निर्णय होईल, असे प्रशासनाकडून सांगण्यात आले आहे.
गोवंडी, शिवाजी नगर, देवनार परिसरात मुस्लिम समाजाची लोकसंख्या नऊ लाखांपेक्षा अधिक आहे. मुस्लिम समाजाकरिता या परिसरात देवनार व रफी नगर अशा दोन दफनभूमी आहेत; मात्र मातीच्या दोषामुळे दोन्ही दफनभूमी बंद करण्यात आल्‍या आहेत. येथे मृतदेह पुरण्यासाठी जागा शिल्लक नाही. तसेच मातीच्या निकृष्ट दर्जामुळे मृतदेहाचे ठरलेल्या कालावधीत विघटन होत नसल्याने दफनभूमी कित्येक दिवसांपासून गोवंडी पालिका पूर्व विभागाने बंद ठेवली आहे. याचा परिणाम म्हणजे मुस्लिम समाजाला दफन विधी करण्याकरिता आठ ते नऊ किलोमीटर जावे लागत आहे.

राष्‍ट्रीय मानवाधिकाराकडून दखल
बंद दफनभूमीतील मातीच्या दर्जाबाबत ‘सकाळ’मध्ये वृत्त प्रसिद्ध झाले होते. तसेच गोवंडी न्यू संगम वेल्फेअर सोसायटी संस्थेचे अध्यक्ष फैयाज आलम शेख यांनी राष्ट्रीय मानवाधिकार आयोगाकडे पत्रव्यवहार केला होता. याची दखल राष्ट्रीय मानवाधिकार आयोगाने घेऊन या संपूर्ण प्रकरणाची चौकशी जिल्हा दंडाधिकाऱ्यांकडे सोपवली आहे.

प्रकरणाची चौकशी व अहवाल
दफनभूमी प्रकरणाची आठ आठवड्यांत चौकशी करण्याचे आदेश आयोगाने जिल्हा दंडाधिकाऱ्यांना दिले आहेत. सोबतच याप्रकरणी काय कारवाई केली, त्याचा संपूर्ण अहवाल देण्याचे निर्देशही दिले आहेत.

शववाहिनीची सुविधा
देवनार व रफी नगर दफनभूमीत मृतदेहाच्या शरीराचे विघटन २१ महिन्यांनंतरही होत नसल्‍याने येथील दफनभूमीत मृतदेह पुरणे अशक्‍य झाले होते. त्‍यामुळे येथील दफनभूमी बंद केली असून येथील मृतदेह इतर दफनभूमीत नेण्याकरिता शववाहिनीची सोय करण्यात आल्याची माहिती गोवंडी पालिका एम पूर्व आरोग्य विभागातील वैद्यकीय अधिकारी डॉ. संजय फुंदे यांनी या पूर्वी दिली आहे.