युनियन बँकेची ९१ कोटींची फसवणूक

सकाळ वृत्तसेवा

मुंबई, ता. ६ : केंद्रीय गुन्हे अन्वेषण विभागाने (सीबीआय) पुण्यातील विकसक के. जे. इन्फ्रास्ट्रक्चर प्रोजेक्ट्स इंडिया प्रायव्हेट लिमिटेड आणि त्यांच्या संचालकांविरुद्ध बँक फसवणूक प्रकरणात गुन्हा नोंदवला आहे. आरोपी संचालकांनी युनियन बँकेची ९१ कोटी रुपयांची फसवणूक केल्याचा आरोप आहे. बँकेने कंपनीविरुद्ध तक्रार केल्यानंतर सीबीआयने कारवाई सुरू केली.

सीबीआयने नोंदवलेल्या गुन्ह्यामध्ये संचालक कल्याण जे. जाधव, कल्याण काकडे, संतोष धुमाळ आणि अमोल पेगुडे, तसेच के. जे. इन्फ्राशी संबंधित दुसरी कंपनी विंग इन्फ्रास्ट्रक्चर इंजिनिअरिंग प्रायव्हेट लिमिटेड आणि विनोद कल्याण जाधव यांची नावे आरोपी म्हणून समाविष्ट आहेत. बँकेने दिलेल्या तक्रारीत आरोपी कंपनी आणि तिच्या प्रवर्तकांनी बँकेकडून जादा रक्कम काढण्यासाठी स्टॉक-बुक, कर्जाचे तपशील आणि बनावट नफ्याचे आकडे, उत्पन्न याबाबत बनावट माहिती दिली होती. कंपनीने याचा फायदा घेत बँकेकडून क्रेडिट सुविधांचा मोठ्या प्रमाणावर लाभ घेत ९१ कोटींची फसवणूक केली.

सीबीआयने याप्रकरणी पुणे आणि परिसरात ठिकठिकाणी झडती घेतली. या कारवाईत आरोपींच्या घरातून महत्त्वाची कागदपत्रे, दस्तावेज, कॉम्पुटर हार्डडिस्क आणि इलेक्ट्रॉनिक गॅझेट्स आदी साहित्य जप्त करण्यात आले आहे.