तोतया अग्निशमन अधिकाऱ्याकडून व्यावसायिकाकडे लाचेची मागणी

तोतया अधिकारी
लाचप्रकरणी अटकेत
मुंबई, ता. ६ : व्यावसायिकाकडे ९० हजार रुपयांची मागणी करणाऱ्या तोतया अग्निशमन अधिकाऱ्याला गुरुवारी (ता. ६) माहीम पोलिसांनी अटक केली आहे. विद्देश गायकवाड (वय २४) असे त्याचे नाव असून त्याला अटक करून पोलिसांनी त्याच्याकडून अग्निशमन दलाचा गणवेश हस्तगत केला आहे.
अग्निप्रतिबंध उपाययोजनांविषयीचे प्रमाणपत्र नसल्याचे कारण पुढे करून आरोपी पैशांची मागणी करत होता. आरोपीने अशा प्रकारे अनेकांची फसवणूक केल्याचा पोलिसांना संशय असून त्याबाबत ते अधिक तपास करत आहेत. आरोपीने बेकरी व अग्निशमनविषयक प्रमाणपत्र आवश्यक असलेल्या इतर आस्थापनांबाबतची माहिती कुठून मिळवली, त्याचे साथीदार कोण याचा तपास पोलिस करत आहेत.
माहीम पोलिस ठाण्याच्या हद्दीतील स्वातंत्र्यवीर सावरकर मार्गावरील गुलजार बेकरीच्या मालकाकडे ३० एप्रिल रोजी एक व्यक्ती आली होती. या व्यक्तीने आपण अग्निशमन अधिकारी असल्याचे सांगून बेकरीचे अग्निप्रतिबंधक उपाययोजनांशी संबंधित प्रमाणपत्र आणि अग्निसुरक्षाविषयक उपाययोजना करण्यात आल्या नसल्याचे व्यावसायिकाला सांगितले. बेकरीच्या मालकाकडे त्याने ९० हजार रुपयांची मागणी केली. तसेच त्यासाठी ३० हजार रुपये अनामत रक्कम भरावी लागेल, असेही त्याने सांगितले. बेकरी मालकाने माहीम पोलिस ठाण्यात तक्रार केली असता पोलिसांनी फसवणूक व तोतयागिरी केल्याप्रकरणी गुन्हा दाखल केला. नंतर आरोपीची ओळख पटवत माहीम पोलिसांकडून आरोपीला अटक करण्यात आली.