एक्स्प्रेसच्या धडकेत रेल्वे कर्मचारी ठार

खर्डी, ता. ८ (बातमीदार) : ट्रॅकवर काम करत असलेल्या रेल्वे कर्मचाऱ्यांना एक्स्प्रेसने धडक दिल्याने एकाचा मृत्यू झाला. शुक्रवारी (ता. ७) रात्री साडेनऊ वाजण्याच्या दरम्यान कसारा स्थानकाजवळ मरीआई मंदिरासमोर ही घटना घडली. या अपघातात अन्य तीन कर्मचारी गंभीर जखमी झाले आहेत. आद्यप्रसाद (मूळ रा. उत्तर प्रदेश) असे मृत कर्मचाऱ्याचे नाव आहे.
शुक्रवारी रात्री साडेनऊच्या दरम्यान नाशिकहून मुंबईला एक्स्प्रेस जात होती. दरम्यान, कसारा स्थानकाजवळील मरीआई मंदिरासमोर चार कर्मचारी ट्रॅकवर सिग्नल यंत्रणेचे काम करत होते. दिवसभर तसेच रात्रीही पाऊस असल्यामुळे कर्मचाऱ्यांना एक्स्प्रेस आल्याचा अंदाज आला नाही. त्याचवेळी अचानक आलेल्या एक्स्प्रेसने चौघांनाही धडक दिली. या धडकेत एका कर्मचाऱ्याचा जागीच मृत्यू झाला; तर अन्य चार जण जखमी झाले आहेत.
या अपघातातील मृत आद्यप्रसाद हा यूपीचा रहिवासी होता. नुकताच तो रेल्वेमध्ये कामाला लागला होता. रिजवान आलम, नीलम मिश्रा व उमेश सिंग अशी जखमी झालेल्यांची नावे आहेत. हे तिन्ही अनुक्रमे कल्याण, नाशिक व इगतपुरी येथील रहिवासी आहे. घटनेची माहिती मिळताच रेल्वे पोलिस व अधिकारी तात्काळ घटनास्थळी हजर झाले. जखमींना कसारा प्राथमिक आरोग्य केंद्र येथे उपचारासाठी नेण्यात आले आहे.