कचराकुंडीत सापडले नवजात अर्भक

नालासोपारा, ता. १० (बातमीदार) : अनैतिक संबंधांतून अथवा नको असलेले मूल जन्माला आल्यानंतर त्याची विल्हेवाट लावण्याचे प्रकार सर्रास घडत आहेत. अशा वेळी काही अर्भके वेळीच उपचार मिळाल्यामुळे सुरक्षित राहतात; तर अनेक अर्भके भटक्या कुत्र्यांची शिकार होतात. रविवारी (ता. ९) सकाळी विरारमध्ये एका कचराकुंडीत नवजात अर्भक सापडल्याची घटना उघडकीस आली आहे. सापडलेले मृत अर्भक पुरुष जातीचे असून पोलिसांनी गुन्हा दाखल करून तपास सुरू केला आहे.
रविवारी सकाळी साडेसातच्या दरम्यान नेहमीप्रमाणे पालिकेची कचरा उचलणारी गाडी विरार पश्चिमेच्या संजीवनी रुग्णालयाजवळील कचरा उचलण्यासाठी गेली होती. त्या वेळी सफाई कर्मचाऱ्यांना कचराकुंडीमध्ये एक नवजात पुरुष जातीचे मृत अर्भक आढळून आले. त्यानंतर कर्मचाऱ्यांनी पोलिसांना ही माहिती दिली. पालिकेची कचरा उचलणारी गाडी ही २४ तासांनंतर येते. त्यामुळे शनिवारी सकाळपासून ते रविवार सकाळपर्यंत कुणी तरी हे अर्भक टाकल्याचा अंदाज व्यक्त करण्यात येत आहे. विरार पोलिसांनी गुन्हा दाखल करून, हॉस्पिटलच्या सीसीटीव्हीची तपासणी केली जात आहे.