लग्नाला नकार बेतला जिवावर

लग्नाला नकार बेतला जिवावर

पनवेल, ता. १८ (वार्ताहर) : लग्नास नकार देणाऱ्या तरुणीवर प्रियकाराने चाकूने वार करून तिला जिवे मारण्याचा प्रयत्न केल्याची घटना नवीन पनवेलमध्ये घडली आहे. या हल्ल्यात तरुणी गंभीर जखमी झाली असून एमजीएम हॉस्पिटलमध्ये तिच्यावर उपचार सुरू आहेत.
कामोठे येथे राहणारी सविता (२३) नवीन पनवेलमधील एका ब्युटी सेंटरमध्ये कामाला आहे. सविताचे खांदेश्वर भागात राहणाऱ्या भगवान कजबळे (२९) याच्याशी प्रेमसंबंध होते. दोघेही एकाच ब्युटी सेंटरमध्ये काम करत होते; मात्र काही महिन्यांपूर्वीच भगवान याला कामावरून काढून टाकण्यात आले होते. तेव्हापासून बेरोजगार असलेल्या भगवान तसेच सवितामध्ये काही ना काही कारणास्तव खटके उडत होते. रविवारी (ता. १६) सविता नेहमीप्रमाणे कामावर गेली होती. दुपारी अडीचच्या सुमारास दुकानाचा मालक जेवण्यासाठी गेल्यानंतर दुकानात एकटीच असलेल्या सविताला भेटण्यासाठी भगवान दुकानावर गेला होता. त्या वेळी दोघांमध्ये वाद सुरू असतानाच भगवानने सविताच्या हातावर, मानेवर, गळ्यावर चाकूने वार करून घटनास्थळावरून पलायन केले.
---------------------------------------
हल्लेखोर पोलिसांच्या ताब्यात
रक्तबंबाळ होऊन गंभीर जखमी असलेल्या सविताने त्याच अवस्थेत शेजारच्या दुकानात धाव घेतली. त्यानंतर दुकानदारांनी तिला एमजीएम हॉस्पिटलमध्ये उपचारांसाठी दाखल केले. या घटनेची माहिती मिळताच खांदेश्वर पोलिसांनी आरोपी भगवान कजबळेविरोधात जीवे मारण्याचा प्रयत्न केल्याप्रकरणी गुन्हा दाखल करून त्याला अटक केली आहे. सविताने लग्न करण्यास नकार दिल्यामुळे भगवानने हा हल्ला केल्याचे पोलिस तपासात उघड झाले आहे.

ब्रेक घ्या, डोकं चालवा, कोडे सोडवा!

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Marathi News Esakal
www.esakal.com