बेस्टच्या स्वमालकीच्या बसेस घेण्याचा विचार

सकाळ वृत्तसेवा
मुंबई, ता. १८ ः बेस्ट बसची संख्या कमी होत असली, तरी प्रवाशांना अधिकाधिक सुविधा उपलब्ध करून देण्यासह मालकीच्या बस खरेदी करण्याचा बेस्टचा विचार सुरू असल्याचे बेस्ट उपक्रमाकडून सांगण्यात आले.
बेस्ट उपक्रमाच्या ताफ्यात ४,५०० बसेस होत्या. मात्र हा ताफा आता ३,१०० वर आला आहे. त्यामुळे प्रवासी संख्येत घट झाली आहे. प्रवाशांना अधिकाधिक सुविधा उपलब्ध करून देण्यासह बेस्टच्या ताफ्यात वाढ करण्यात येणार आहे. बस ताफ्यात वाढ करताना अधिकाधिक बसेस बेस्टच्या मालकीच्या असतील यावर भर देण्यात येईल, असे बेस्ट उपक्रमाकडून सांगण्यात आले.
बेस्टला बस पुरवठा करणारे सध्या सात विविध कंत्राटदार आहेत. यापुढेही विविध कंत्राटदारांमार्फत बस ताफ्यात येणार आहेत; मात्र या कंत्राटदारांचे विविध अनुभव बघता, या कंत्राटदारावर पूर्णपणे विसंबून राहणे शक्य नाही. त्यामुळे कंत्राटदारांच्या बसेस व स्वमालकीच्या बस यात समतोल राहावा म्हणून लवकरच स्वमालकीच्या बस घेण्यासाठी विचार सुरू असून लवकरच याचा निर्णय घेण्यात येणार असल्याचे बेस्ट उपक्रमाकडून सांगण्यात आले.
------------------------
चलो अॅपचा आढावा
चलो अॅप प्रवाशांच्या पसंतीस उतरले असून बेस्ट उपक्रमाला या अॅपमुळे कुठलेही उत्पन्न मिळत नाही; तरीही चलो ॲपला एवढे प्रोत्साहन का दिले जाते, याचा अभ्यास बेस्ट करणार असल्याचे उपक्रमाकडून सांगण्यात आले.