एसटीच्या परिपत्रकात सुधारणा

सकाळ वृत्तसेवा
मुंबई, ता. १८ : क्षयरोग, कॅन्सर आणि कुष्ठरुग्णांना ४५ वर्षांपूर्वी एसटीच्या साध्या बसमध्ये निःशुल्क प्रवासाची सुविधा सुरू करण्यात आली होती. त्यानंतर सिकलसेल, एचआयव्ही बाधित, डायलिसिस, हिमोफेलियाग्रस्त रुग्णांसाठी सेवाभावी संस्थांनी एसटीतून उपचाराला जाणाऱ्या रुग्णांसाठी सवलत मागितली होती. त्याप्रमाणे २०१८ मध्ये साध्या बसमध्ये ही सवलत लागू केली. दरम्यान, परिपत्रक काढताना निमआराम, आराम बसमध्येही सुविधा असल्याचा चुकीने उल्लेख आल्याने आणि प्रत्यक्षात निमआराम, आराम बसमध्ये सवलत मिळत नसल्याने सेवाभावी संस्थांच्या तक्रारीनंतर आता एसटी महामंडळाने आपली चूक दुरुस्त केली आहे.

एसटी महामंडळाच्या वाहतूक विभागाने आता नव्याने परिपत्रक काढले असून क्षयरोग, कॅन्सर आणि कुष्ठरुग्णांप्रमाणे सिकलसेल, एचआयव्ही बाधित, डायलिसिस, हिमोफेलियाग्रस्त यांनाही साध्या बस मधूनच निःशुल्क प्रवासाची सवलत लागू असल्याचे स्पष्टीकरण दिले आहे; तर नवीन परिपत्रकातून निमआराम आणि आराम बसचा उल्लेख काढून टाकण्यात आला आहे. २०१८ च्या चुकीच्या परिपत्रकामुळे रुग्णांच्या सामजिक संस्थांनी एसटी महामंडळ प्रशासनाकडे इतरही बसमधून प्रवासी सवलत दिली जात नाही अशा तक्रारी केल्या होत्या. त्यानंतर ही चूक लक्षात आली असल्याचे वाहतूक महाव्यवस्थापक शिवाजी जगताप यांनी सांगितले आहे.

-----------
रुग्णांना आधीच त्यांच्या उपचारासाठी वेळोवेळी रुग्णालयात जावे लागते. एसटी प्रवास करणाऱ्या रुग्णांची आर्थिक परिस्थिती हलाखीची असते. त्यामुळे प्रवासासाठी एसटी महामंडळाच्या बसशिवाय या रुग्णांना पर्याय नाही. सध्या ग्रामीण भागातसुद्धा साध्या बसच्या फेऱ्या कमी करून, शिवशाही, हिरकणी बसच्या फेऱ्या वाढवण्यात आल्या आहेत. जरी गेल्या ४५ वर्षांपासून साध्या बसमधूनच निःशुल्क प्रवासाची सुविधा दिली जात असली, तरी रुग्णांच्या परिस्थितीचा विचार करून ही सवलत सर्व प्रकारच्या बसमधून द्यावी.
- गौरव जाधव, प्रहार संघटना