एटीएम व्हॅनमधील रोकड लुटून चालकाचे पलायन

सकाळ वृत्तसेवा
मुंबई, ता. १८ : कांदिवली पूर्व परिसरात एटीएममध्ये भरण्यासाठी आणलेली रक्कम घेऊन चालकाने पलायन केल्याची घटना उघडकीस आली आहे. आरोपी चालकाने २२ लाख ४३ हजार रुपयांची रोकड पळवली असून याप्रकरणी समतानगर पोलिस अधिक तपास करीत आहेत. आरोपी चालक सागर सोनवणे याचा शोध पोलिस घेत आहेत.

या प्रकरणी तक्रारदार राजाराम घाडीगावकर एका खासगी कंपनीत कार्यरत आहेत. त्यांची कंपनी विविध बँकांकडून रोख रक्कम घेऊन ती विविध बँकांच्या एटीएम मशीन भरणा करण्याचे काम करते. घाडीगावकर नेहमीप्रमाणे गत शनिवारी (ता. १५) साडेतीन कोटी रुपयांची रोकड घेऊन बँकेतून निघाले होते. या वेळी त्यांच्यासोबत चालकासह दोन सहकारी होते. इतर एटीएम मशीनमध्ये रक्कम भरल्यानंतर कांदिवली येथील ठाकूर संकुलातील एटीएम मशीनमधून त्यांनी २२ लाख ४३ हजार रुपये घेतले. त्यानंतर ते गाडी घेऊन आकुर्ली रोड येथे पैसे भरण्यासाठी गेले होते. त्यावेळी आरोपी चालकही व्हॅनमध्येच होता. घाडीगावकर परत आले असता चालकाने रोकड घेऊन पलायन केल्याचे त्यांच्या लक्षात आले. घाडीगावकर यांनी चालकाला फोन करण्याचा प्रयत्न केला; पण त्याचा मोबाईल बंद होता. अखेर याप्रकरणी त्यांनी समतानगर पोलिस ठाण्यात तक्रार केली. त्यानुसार पोलिसांनी चालक सागर सोनावणेविरोधात गुन्हा दाखल करत सीसी टीव्ही फुटेजच्या मदतीने आरोपीचा शोध सुरू केला आहे.