नोकरीच्या आमिषाने तरुणाची फसवणूक

सकाळ वृत्तसेवा

डोंबिवली, ता. २६ : मलेशियन एअर लाईन्समध्ये नोकरीची संधी असल्याचे प्रलोभन दाखवत डोंबिवलीतील तरुणाची फसवणूक केल्याची घटना उघडकीस आली आहे. नोकरी व पैसेही परत मिळत नसल्याने आपली फसवणूक झाल्याचे लक्षात येताच फिर्यादी आदित्य दीक्षित याने याप्रकरणी मानपाडा पोलिस ठाण्यात तक्रार दाखल केली. या तक्रारीनुसार आरोपी प्रदीप ढोणे याच्या विरोधात गुन्हा दाखल करण्यात आला आहे. मुंबई येथे राहणाऱ्या प्रदीप याने चार वर्षांपूर्वी आदित्य याला मलेशियन एअरलाईन्स कंपनीत आपली ओळख असून तेथे ॲडमिरल एव्हिएशनमध्ये प्रशिक्षणाची संधी उपलब्ध आहे, असे सांगितले. आदित्य याने प्रदीपच्या बोलण्यावर विश्वास ठेवत प्रदीपला ५ लाख २० हजार रुपये दिले. पैसे देऊन झाल्यानंतर आदित्य यांनी आपणास प्रशिक्षणासाठी जाण्याची संधी कधी मिळेल, म्हणून प्रदीपकडे विचारणा सुरू केली. आरोपीच्या वेळकाढूपणामुळे आदित्यला आपली फसवणूक झाल्याचे लक्षात आले. दरम्यान, सततच्या पाठपुराव्याने आरोपीने आदित्यला २ लाख २० हजार रुपये परत केले. चार वर्षांच्या कालावधीत उर्वरित ३ लाखांची रक्कम परत करण्यास प्रदीपने नकार दिल्याने आदित्यने प्रदीप विरोधात मानपाडा पोलिस ठाण्यात तक्रार केली. पोलिसांनी फसवणुकीचा गुन्हा दाखल केला आहे.