म्हाडा भाडेकरूंचे आंदोलन स्थगित

सकाळ वृत्तसेवा
मुंबई, ता. २६ ः म्हाडा पुनर्रचित इमारतींच्या पुनर्विकासाच्या मुद्द्यावरून मुंबईतील ३८८ विनाउपकरप्राप्त इमारतीतील भाडेकरू कुटुंबांनी आझाद मैदानात आंदोलनाचा इशारा दिला होता. मुख्यमंत्री एकनाथ शिंदे यांनी औचित्याच्या मुद्द्यावरील प्रश्नाला उत्तर देताना भाडेकरूंच्या मागणीनुसार या इमारतींचा पुनर्विकास ३३ (७) अंतर्गत केला जाईल, याबाबत आश्वासन दिल्याने म्हाडा भाडेकरूंचे आज होणारे आंदोलन स्थगित करण्यात आल्याची माहिती म्हाडा संघर्ष कृती समितीने दिली आहे.
म्हाडा पुनर्रचित इमारतींचा विकास ३३ (७) अंतर्गत करण्यात यावा, अशी मागणी म्हाडा पुनर्रचित इमारतीतील भाडेकरू करत आहेत. तसेच या इमारतींचा पुनर्विकास करत असताना म्हाडानेही त्यात असावे, अशी मागणी भाडेकरूंची होती. या कारणाने आज (ता. २७) आझाद मैदानात ३८८ इमारतींतील २७ हजार भाडेकरूंनी आंदोलनाचा इशारा दिला होता. हा मुद्दा विधानसभेतही उपस्थित करण्यात आला. आमदार अजय चौधरी आणि आमदार सदा सरवणकर यांनी औचित्याचा मुद्दा उपस्थित करून भाडेकरूंना न्याय द्यावा, अशी मागणी केली. या प्रश्नाला उत्तर देताना मुख्यमंत्री एकनाथ शिंदे यांनी म्हाडा पुनर्रचित इमारतींचा विकास ३३(७) अन्वये केला जाईल, असे आश्वासन दिले.
...
आदेश निघण्याची आशा
म्हाडा संघर्ष कृती समितीची मागणी सरकारने मान्य केली आहे. त्यामुळे २७ जुलैला धरणे आंदोलनास स्थगिती देण्यात आली आहे. मुख्यमंत्र्यांनी सभागृहात आश्वासन दिले आहे. त्यावर आमचा विश्वास आहे. लवकरच याबाबत शासकीय आदेश निघेल, अशी आम्हाला आशा आहे. जर सरकारने शासकीय आदेश काढण्याबाबत दिरंगाई केली, तर पुन्हा विधानसभा हिवाळी अधिवेशनादरम्यान धरणे आंदोलन करण्यात येईल, असे म्हाडा संघर्ष कृती समितीकडून सांगण्यात आले.