घारापुरी बेटावर पुन्हा लखलखाट

सकाळ वृत्तसेवा
नवी मुंबई. ता. २९ : घारापुरी बेटाला वीजपुरवठा करणाऱ्या तीन केबलपैकी एकामध्ये बिघाड झाला होता. त्यामुळे राजबंदर, शेतबंदर, मोराबंदर या तिन्ही गावांचा वीजपुरवठा खंडित झाला होता. न्हावा खाडी ते मोराबंदर दरम्यान समुद्राखालील असलेल्या केबलमधील हा बिघाड तब्बल महिनाभरानंतर दुरुस्त करण्यात महावितरणला यश आले आहे. त्यामुळे घारापुरी बेटावर पाणीपुरवठ्याची समस्याही दूर झाली आहे.
घारापुरीला वीजपुरवठा करणाऱ्या सिंगल कोर समुद्राखाली असल्याने नादुरुस्त झाल्या होत्या. न्हावाखाडी ते मोरा बंदरदरम्यान असल्याचे महावितरणाच्या शोध मोहिमेत स्पष्ट झाले होते. मात्र, वादळी वाऱ्यासह समुद्रातील भरती ओहोटीमुळे निर्माण होणाऱ्या अपरिहार्य परिस्थितीचा सामना करत नादुरुस्त सिंगल कोर केबलमधील बिघाड शोधण्यासाठी महावितरणच्या पनवेल शहर विभागातील कर्मचारी महिन्याभरापासून प्रयत्न करत होते. अखेर महिन्यानंतर वीजपुरवठा सुरळीत करण्यात आला आहे. त्यामुळे तिन्ही गावांच्या पाण्याची समस्या सुटली आहे.
----------------------------------
कर्मचाऱ्यांच्या मेहनतीला यश
या कामासाठी पनवेल शहराचे कार्यकारी अभियंता सतीश सरोदे, अतिरिक्त कार्यकारी अभियंता देविदास बैकर, सहाय्यक अभियंता रणजित देशमुख व विभागातील प्रत्येक कर्मचाऱ्यांनी विशेष मेहनत घेतली आहे. तसेच व्यवस्थापकीय संचालक चंद्रकांत डांगे व भांडुप परिमंडळचे मुख्य अभियंता सुनील काकडे यांनी जातीने लक्ष देऊन कामाला गती देण्यासाठी वाशी विभागाचे अधीक्षक अभियंता प्रभारी सिंहाजीराव गायकवाड यांना सूचना दिल्या होत्या. त्यामुळे महावितरणच्या कर्मचाऱ्यांनी दाखवलेल्या या धाडसाचे आता सर्व स्तरांतून कौतुक होत आहे.