गणरायाच्या वाजत-गाजत आगमनाचे संकेत

तुर्भे, ता.३१(बातमीदार): काही वर्षांपूर्वी डॉल्बीच्या दणदणाटावर भल्याभल्यांचे पाय थिरकायला लागायचे. मात्र, अल्पवधीतच डॉल्बीवर निर्बंध आल्याने बाप्पाच्या आगमनासाठी पारंपरिक वाद्यांना पसंती दिली जात आहे. अशातच गणेशोत्सव जवळ आल्याने ढोल-ताशा पथकांकडून लयबद्द चाली रचण्याच्या तयारीला वेग आला आहे.
सणासुदी तसेच लग्न सराईच्या काळात शहरातील ब्रास बँड पथकाला देखील मागणी वाढू लागल्याने त्याचा देखील सराव जोरात सुरू झाला आहे. लग्नसराई संपली की तीन महिने पथकाला आराम असतो. त्यामुळे या काळात वाद्यांची दुरुस्ती तसेच नवी गाण्याची चाल रचण्याची कामे केली जातात. गणेशोत्सवाची चाहूल लागताच बँड पथकाची सरावासाठी घालमेल सुरू होते. यानुसार प्रत्येकाच्या कामाच्या वेळेनुसार वेळापत्रक बनवून मग दैनंदिन सराव सुरू केला जातो. संध्याकाळ झाली की बँड पथके सरावात तल्लीन होताना दिसतात. गावातील बँड पथके ही गावातील मोकळ्या मैदानात किंवा गावातील मंदिर परिसरात सराव सुरू केला जातो. पण शहरी भागातील ढोलताशे पथकांसमोर जागेची अडचण असल्याने शहरातील उड्डाणपूल, ठाणे-बेलापूर मार्गांवर सराव करावा लागत आहे.
-----------------------------------------
नवीन लय, ठेकावर भर
गणपतीसाठी नवीन लय, ठेका व ताल शिकण्यासाठी बहुतांश ढोल-ताशा पथकातील तरुणाई सध्या सरावातून मेहनत घेत आहे. गणेश उत्सवानिमित्त जवळपास दीड महिना आधीपासून सराव सुरू झाला आहे. नियमित पथकातील सदस्यांचा दिनक्रम पूर्ण करून सायंकाळी सहा ते नऊ या वेळेस सराव चालतो, पथकात साधारण आठ वर्षांपासून ५५ वर्ष वयोगटापेक्षा शंभर ते दोनशेपेक्षा अधिक सदस्यांचा सहभाग असतो.
--------------------------------------
ढोल-ताशा पथकांची नियमावली
काही पथक सदस्याकडून शुल्क घेतात, तर काही घेत नाहीत, सध्या तरुणाईचा ढोल-ताशा मंडळांमध्ये सहभाग होण्यासाठी मोठा उत्साह दिसत आहे. मिरवणुकीमध्ये सहभागी भक्तांना आनंद मिळेल अशा ठेक्यांना अधिक पसंती मिळत आहे. गणपती बाप्पाच्या आगमनापासून ते विसर्जनापर्यंत सर्वच बॅण्ड पथकांनी सराव सुरु केला असून प्रत्येक ढोल-ताशा पथकांचे स्वतःचे असलेले नियम सदस्यांना पाळावे लागतात.
--------------------------------------
नवी मुंबईत २३ बँड पथके
दिवाळे कोळीवाडा- ३, शिरवणे - २, घणसोली-२, कोपरखैरणे-२, गोठीवली-२, दिवा कोळीवाडा-१, खैरणे बानकोडे-१, सानपाडा-१, वाशी गाव- १, सारसोळे-१, कुकशेत-१, जुईनगर-१, करावे गाव-१, बेलापूर गाव-२ आणि तुर्भे गाव-१ अशी नवी मुंबईत एकूण २३ बँड पथके आहेत, तर ७० पेक्षा अधिक बँजो पथके आहेत.
----------------------------------------
दरवर्षी लग्नसराई, पालखी सोहळा किंवा एखाद्या शुभ प्रसंगी बॅण्ड वादनाची प्रथा आहे. त्यामुळे मे महिन्यापर्यंत बॅण्ड पथकांना आगाऊ बुकिंग फूल झालेली असते. मात्र, पावसाळ्याचे तीने महिने काम नसल्याने वाद्यांची दुरुस्ती तसेच नवीन गाण्यांची पूर्व तयारी करण्यात येते.
-मिलिंद कोळी, वादक, छाया कला सर्कल ब्रास बॅण्ड