सोनसाखळी चोराला अटक

सकाळ वृत्तसेवा

डोंबिवली, ता. ११ ः तडीपार सराईत गुन्हेगाराला सापळा रचून अटक करण्यात आली आहे. अक्षय अहिरे (वय २४) असे त्याचे नाव आहे. ठाणे जिल्ह्यातून तडीपार केल्यानंतरही तो डोंबिवलीत उघड फिरत होता. दारूच्या नशेत पडलेल्या व्यक्तीची सोनसाखळी चोरल्याचा त्याच्यावर आरोप आहे.

कल्याण रोडवरील शेलार नाका परिसरात असलेल्या बारसमोर २९ जुलैला एक व्यक्ती मद्यधुंद अवस्थेत रस्त्यावर पडली होती. त्याला मदत करण्याच्या बहाण्याने अक्षय याने मद्यपीच्या गळ्यातील ४ तोळ्याची सोनसाखळी चोरली. मद्यपीला शुद्ध आल्यावर साखळी चोरीला गेल्याची बाब त्याच्या लक्षात आली. याप्रकरणी त्याने टिळकनगर पोलिस ठाण्यात तक्रार दाखल केली होती. त्यानुसार पोलिसांनी शोध घेतला असता अक्षय अहिरे याने चोरी केल्याचे उघड झाले होते. त्यानंतर त्याला सापळा रचत अटक करण्यात आली आहे. तो तडीपार असल्याचे समोर आले आहे.