अनधिकृत पार्किंग करणाऱ्या ३३ ट्रॅव्हल्सवर कारवाई

नालासोपारा, ता. १८ (बातमीदार) : विरारमध्ये मुख्य रस्त्यावर पार्किंग करून मुख्य रस्ता गिळंकृत करणाऱ्या ३३ ट्रॅव्हल्सवर शुक्रवारी (ता. १८) धडक कारवाई करण्यात आली. अवघ्या दोन तासांत ७३ हजार ५०० रुपयांचा दंड वसूल करण्यात आला आहे. वसई-विरार महापालिका आणि विरार वाहतूक शाखा यांनी संयुक्तपणे ही कारवाई केली आहे. कारवाई सुरू होताच अनेक ट्रॅव्हल्सचालकांनी पळ काढला.

विरार पूर्व मनवेलपाडा ते नालासोपारा, बायपास रोड, लिंक रोड, मोहक सिटी परिसर या ठिकाणी मोठमोठ्या ट्रॅव्हल्सनी पार्किंग करून ३० मीटरचे रस्ते गिळंकृत केले आहेत. रस्त्यावरून जाणारे नागरिक, शाळेत मुलांना सोडायला जाणाऱ्या महिला-पुरुष वाहनधारक, आजूबाजूच्या सोसायटीतील रहिवाशांना यामुळे मोठा त्रास सहन करावा लागत आहे. सहा महिन्यांपूर्वी एका ट्रॅव्हल्समध्ये अनोळखी मृतदेहही सापडला होता. याबाबत माजी स्थायी समिती सभापती प्रशांत राऊत, शिवसेना उद्धव बाळासाहेब ठाकरे गटाचे शहराध्यक्ष उदय जाधव, मनसेचे प्रफुल जाधव, प्रहार संघटनेचे हितेश जाधव यांच्यासह रहिवाशांनी आरटीओ, वाहतूक पोलिस, महापालिकेकडे अनेक तक्रारी केल्या होत्या. शुक्रवारी वसई-विरार महापालिका आणि विरार वाहतूक पोलिस यांनी संयुक्तरीत्या ३३ ट्रॅव्हल्सवर कारवाई करून तत्काळ ७३ हजार ५०० रुपयांचा दंड वसूल करून, सर्व ट्रॅव्हल्स त्या ठिकाणाहून हलवल्या आहेत.

--------------
आमच्याकडे अनेक दिवसांपासून तक्रारी होत्या. आम्ही दंडात्मक कारवाया केल्या होत्या. याच ट्रॅव्हल्सवर आठ हजारांपासून ३६ हजारांपर्यंत ऑनलाइन दंड भरणा थकीत होते. आम्ही आज धडक कारवाई करून ७३ हजाराचा दंड वसूल केला आहे. यानंतरही कारवाई सुरूच राहणार आहे.
- प्रशांत लांगी, प्रभारी पोलिस निरीक्षक, वाहतूक शाखा

---------------
आमच्या सर्व ट्रॅव्हल्स कोकणातील विविध भागात चालतात. मनवेलपाडा परिसरात कोकणातील जास्त नागरिक राहतात. आम्ही शासनाला टॅक्स देतो. आमच्या ट्रॅव्हल्सला पालिकेने अधिकृत पार्किंग व्यवस्था करून द्यावी, यासाठी संबंधित प्रशासनाकडे मागणी केली आहे; पण कोणी लक्ष देत नसल्यामुळे आम्हाला मोकळ्या जागेत गाड्या पार्किंग कराव्या लागतात.
- ॲन्थोनी डिसूझा, पालघर जिल्हा सचिव, मुंबई ट्रॅव्हल्स, बस चालक-मालक संघटना