आरे तलावातील विसर्जनबंदीबाबत चर्चा

मुंबई, ता. १८ ः आरे तलावात सार्वजनिक आणि घरगुती गणपती मूर्तींच्या विसर्जनाला आरे दुग्धालय प्रशासनाने बंदी घातली आहे. त्याबाबत आरे प्रशासनाशी चर्चा करण्यासाठी उपनगर गणेशोत्सव समन्वय समिती आणि स्थानिक आमदार लवकरच भेट घेणार आहेत.
केंद्र सरकारचा पर्यावरण जलवायू व हवामान बदल विभाग यांनी ५ डिसेंबर २०१६ च्या अधिसूचनेनुसार आरे दुग्ध वसाहतीमधील संपूर्ण परिसर पर्यावरण व संवेदनशील क्षेत्र इको-सेन्सिटिव्ह झोन म्हणून घोषित करण्यात केले असून आरे तलावात गणपती विसर्जन करता येणार नाही, असे पत्र काढले आहे. त्या पत्रामुळे घरगुती गणपती व सार्वजनिक गणेशोत्सव मंडळ यांना कुठलाही पर्याय न देता या घेतलेल्या प्रशासनाच्या निर्णयावर मोठ्या प्रमाणात नाराजी पसरली आहे. अचानक विसर्जनावर बंदी आणल्यामुळे आरे तलावात गणेश विसर्जन करणारी सार्वजनिक मंडळे व घरगुती गणेशोत्सव साजरे करणाऱ्यांची अडचण होणार आहे. त्याबाबत कार्यकारी अधिकारी आरे यांच्याशी विचारविनियम करण्यासाठी मुंबई उपनगर श्री गणेशोत्सव समिती समन्वय समिती, स्थानिक आमदार रवींद्र वायकर, सुनील प्रभू यांची संयुक्त बैठक होणार असून त्याबाबत तोडगा काढण्यात येणार आहे, अशी माहिती आमदार विनोद घोसाळकर यांनी दिली आहे. त्याबाबत तशी मागणी एका पत्राद्वारे त्यांनी केली आहे.