आरोग्य व्यवस्था सुधारवण्यासाठी निधी पुरवणार

सकाळ वृत्तसेवा
ठाणे, ता. १८ : कळवा रुग्णालयात मोठ्या प्रमाणात झालेल्या रुग्णांच्या मृत्यूसंदर्भात मुख्यमंत्र्यांनी गांभीर्याने लक्ष दिले आहे. येथील आरोग्य व्यवस्था सुधारावी, यासाठी निधी आणि मनुष्यबळासाठी चालना देण्यासाठी प्रयत्न करणार असल्याचे मत विधान परिषदेच्या उपसभापती नीलम गोऱ्हे यांनी व्यक्त केले. तसेच विधान परिषदेच्या उपसभापती या नात्याने आणि ठाणेकरांना कशी मदत करता येईल, हाच आपला हेतू असल्याचेदेखील त्यांनी स्पष्ट केले.
शुक्रवारी (ता. १८) ठाणे जिल्हाधिकारी कार्यालयात कळवा रुग्णालयातील घटनेसंदर्भात बैठक आयोजित करण्यात आली होती. या बैठकीला चौकशी समितीमधील पदाधिकारी, कळवा रुग्णालयातील डॉक्टरदेखील उपस्थित होते. त्यानंतर पत्रकारांशी बोलताना त्यांनी ही माहिती दिली. कळवा रुग्णालयात घडलेली घटना अतिशय दु:खद आणि धक्कादायक आहे; परंतु कोविड काळात आणि कोविडनंतर बऱ्याचशा अत्यवस्थ असलेल्या रुग्णांना जीव गमावण्याची वेळ येते, याची वस्तुस्थिती काय आहे, आणि हे का घडले, याच्या खोलामध्ये जाणे गरजेचे आहे. तसेच मृतांमध्ये ऑक्सिजनच प्रमाण किती होते, आयसीयूमध्ये कोणती कमतरता पडली होती का, त्यावेळी डॉक्टर किती होते, याचा अंदाज घेतला आहे. ज्या डॉक्टरांनी आणि येथील कर्मचाऱ्यांनी १८ मृत्यू पाहिले आहेत, त्यांना मानसिक बळ देण्याची गरज असल्याचेही त्यांनी यावेळी सांगितले.