रस्त्यांवरील धुळीने नाकीनऊ

वाशी, ता. २१ (बातमीदार)ः ठाणे-बेलापूर मार्गावर अंतर्गत रस्त्यांवर धुळीचे लोट दिसत आहेत. मान्सून काळात रस्त्यांवर पडलेल्या खड्डयांमध्ये महापालिकेच्यावतीने खडी-माती टाकून खड्डे बुजवण्यात आले होते. मात्र, काही दिवसांपासून पावसाने विश्रांती घेतली असल्याने रस्त्यावरील उडणाऱ्या धुळीमुळे वाहनचालक, पादचारी हैराण झाले आहेत.
महापे-शिळफाटा रस्ता, दिघा ते पावणे एमआयडीसीतील अंतर्गत रस्ते, तुर्भे नाका ते इंदिरा नगर व एमआयडीसीत जाणारा रस्ता, ऐरोलीतील पटनी कंपनीजवळचा रस्ता, ठाणे-बेलापूर मार्ग, एमआयडीसी पट्टीतील रस्ते, तसेच औद्योगिक पट्ट्यात धुळीचे लोट उसळत आहेत. त्यामुळे एमआयडीसीतील कामगारही बेजार झाले आहेत. त्यांना दमा, खोकला, सर्दीसारखे आजार होत आहेत. ठाणे-बेलापूर मार्गावर स्विपिंग मशिनचा वापर करण्यात येतो, पण मशिनने पूर्णपणे रस्ता साफ होत नसल्याने ठाणे-बेलापूर मार्गावर रस्त्यावरील धुळीचे लोट उसळत आहे. तसेच अंतर्गत रस्त्यांवरील खड्ड्यांमुळे तोंडाला रुमाल लावून फिरण्याची वेळ आली आहे.
------------------------------------------
एमआयडीसीतील रबाळे येथील कंपनीत धुळीने कपडे पूर्णपणे खराब होतात. रस्त्यावरून एखादे वाहन गेल्यास नाका-तोंडात धूळ जात असल्याने तोंडाला रुमाल धरावा लागतोय.
- सचिन विनेरकर, कामगार, रबाळे
------------------------------------------
पावसाळ्यात रस्त्याने चालताना अंगावर चिखल उडत होता. आता पावसाने उसंत घेतल्यानंतर धुळीचे लोट उडत आहेत. या धुळीमुळे रस्त्याने चालताना श्वास घेणेही कठीण झाले आहे.
- किसन मिटगुले, नागरिक