दुचाकी अपघातात तरुण ठार; एक गंभीर

नवी मुंबई, ता. २१ (वार्ताहर) : वाशी येथून पाम बीचमार्गे उलवे येथे जात असलेल्या तरुणांच्या दुचाकीला अज्ञान वाहनाने धडक दिल्याने झालेल्या अपघातात एका तरुणाचा मृत्यू झाला. या अपघातात दुसरा एक जण गंभीर जखमी झाल्याची घटना सोमवारी (ता. २१) पहाटे अडीचच्या सुमारास नेरूळ येथील सारसोळे जंक्शन येथे घडली. नेरूळ पोलिसांनी या अपघातातील अज्ञात वाहन चालकाविरोधात गुन्हा दाखल करून त्याचा शोध सुरू केला आहे. मनदीप सुरजलाल सिंग (वय २६) असे अपघातील मृताचे नाव आहे; तर विवेक स्वामी (वय २७) असे जखमीचे नाव आहे. हे दोघेही उलवे येथे राहण्यास असून रविवारी रात्री मित्राची दुचाकी घेऊन वाशी येथे गेले होते. त्यानंतर हे दोघेही पहाटे सव्वा दोनच्या सुमारास दुचाकीवरून पामबीच मार्गाने उलवे येथे जात होते. त्यांची दुचाकी पामबीच मार्गावरील सारसोळे जंक्शनवर आली असताना अज्ञात वाहनाने त्यांना धडक दिली. यात मनदीप सिंग हा गंभीर जखमी झाल्याने त्याचा काही वेळातच मृत्यू झाला. जखमी विवेक स्वामी याच्यावर डी. वाय. पाटील हॉस्पिटलमध्ये उपचार सुरू आहेत.