सायबर चोरट्याचा ट्रान्सपोर्ट व्यावसायिकाला गंडा

पनवेल, ता. २५ (वार्ताहर) : फेसबुकवर कारच्या विक्रीची जाहिरात देऊन एका सायबर चोरट्याने पनवेलमध्ये राहणाऱ्या ट्रान्स्पोर्ट व्यावसायिकाकडून ऑनलाईन २ लाख ४२ हजार रुपये उकळून त्याची फसवणूक केल्याचे उघडकीस आले आहे. पनवेल तालुका पोलिसांनी या प्रकरणातील सायबर चोरट्याविरोधात फसवणुकीसह आयटी ॲक्टनुसार गुन्हा दाखल करून त्याचा शोध सुरू केला आहे. या प्रकरणात फसवणूक झालेला ट्रान्स्पोर्ट व्यावसायिक गणपत घोडके (३६) हे पनवेल तालुक्यातील डेरवली गावात राहण्यास आहेत. मागील जून महिन्यात गणपत यांना मूळ गावी कुटुंबासह येण्या-जाण्यासाठी गाडी हवी असल्याने तो सेकंडहँड गाडीच्या शोधात होते. यादरम्यान, फेसबुकवर एक कार ४५ हजार रुपयांमध्ये विक्रीसाठी उपलब्ध असल्याची जाहिरात त्यांच्या निदर्शनास आली. त्यामुळे गणपत यांनी जाहिरातीत असलेल्या गाडीमालक श्रीकांत सुर्वे याच्याशी संपर्क साधून कार विकत घेण्याची तयारी दर्शविली. या वेळी सायबर चोरट्याने तो भारतीय सेनेत कमांडर असल्याचे सांगून गणपतला कुरियर स्लिप चार्जेस, डॉक्युमेंट चार्जेस, डिलिव्हरी चार्जेस तसेच संगणक पावतीचे कारण सांगून गणपतकडून दोन लाख ४२ हजार रुपये उकळले.