बहिण-भावाचा सणाला मिळणार लालपरी जोड

सकाळ वृत्तसेवा
ठाणे, ता. २८ : लालपरीतून महिला वर्गाला सवलत जाहीर झाल्यानंतरचा हा पहिला रक्षाबंधन असल्याने जणू त्यांच्यासाठी सवलतीची राखी असणार आहे. त्यानुसार बहीण-भावाच्या नात्याचे अतूट बंधन असलेल्या रक्षाबंधनासाठी महाराष्ट्र राज्य परिवहन महामंडळाचा ठाणे विभाग आता सज्ज झाला आहे. यंदाही रक्षाबंधनाला बुधवारी होणारी गर्दी लक्षात घेत, नियमित गाड्यांसह ९० जादा गाड्या विशेष मार्गांवर सोडण्याचा निर्णय घेण्यात आला आहे.
नारळीपौर्णिमा तसेच रक्षाबंधन या दिवशी ठाणे विभागातील प्रत्येक आगारात दरवर्षी प्रवाशांची मोठी रेलचेल असते. रक्षाबंधनादिवशी विभागास नेहमीच समाधानकारक भारमान प्राप्त होत असते. त्यामुळे गेल्या वर्षी चार लाख ५१ हजार ३४१ रुपये उत्पन्नाच्या स्वरूपात धनलक्ष्मी एसटीच्या तिजोरीत जमा झाली होती. यावर्षीही या कालावधीत मोठ्या प्रमाणावर प्रवाशांची गर्दी होणार असल्याची शक्यता असल्याने आगारांनी चांगले भारमान असणाऱ्या मार्गावर मोठ्या प्रमाणात जादा वाहतूक करण्याबाबत सूचना केल्या आहेत. या दिवशी आगारांतील एकही वाहन मार्ग बंद राहणार नाही, याची दक्षता घेतली जाणार आहे. याशिवाय गर्दीचा निपटारा योग्य पद्धतीने करण्यासाठी जादा वाहतुकीचे योग्य नियोजन आगार पातळीवर त्वरित करावे. तसेच या दिवशी आगार कक्षेत ज्या मार्गांवर प्रवाशी चढ-उतार ही मोठ्या प्रमाणावर असते अशा ठिकाणी प्रवाशी चढ-उतार करण्यासाठी, प्रवाशांना योग्य मार्गदर्शन करण्यासाठी कर्मचाऱ्यांचा वापर करणे बंधनकारक आहे. या दिवशी आपल्या आगारातील एकही फेरी कोणत्याही कारणास्तव रद्द होणार नाही, या दृष्टीने आवश्यक ती काळजी घेण्यात आली आहे, असे महामंडळाकडून सांगण्यात आले.
..................................
अशा सुटणार जादा गाड्या
ठाणे १ : पुणे ४, बोरिवली ४, भाईदर ३ , सातारा ३, कोल्हापूर १
ठाणे २ : पुणे २, बोरिवली २, पनवेल ६, भिवंडी ३, सातारा १, कोल्हापूर १
भिवंडी : ठाणे ३, बोरिवली २, कल्याण ४, पुणे १, नगर १
शहापूर : कसारा-नाशिक ३, भिवंडी-ठाणे २, भिवंडी-कल्याण २, शहापूर-किन्हवली ३
कल्याण: नगर ३, आळेफाटा ३, पनवेल ४, भिवंडी ३
मुरबाड : कल्याण ३, नगर १, आळेफाटा ३
विठ्ठलवाडी : कल्याण-भिवंडी ३, कल्याण-पनवेल ३, कल्याण-जव्हार ३, आळेफाटा १
वाडा : ठाणे ३, पुणे २, कल्याण ३