आता २४ तासांत वीजमीटर

श्रीवर्धन, ता. २९ (बातमीदार) : घरगुती व व्यावसायिक (वाणिज्य) वीज जोडणीसाठी कागदपत्रांसह अचूक अर्ज करणाऱ्या ग्राहकांना आता अवघ्या २४ तासांत जोडणी दिली जात आहे. ‘महावितरण’चे कनिष्ठ अभियंता डी. बी. घुगे यांनी वरिष्ठांच्या मार्गदर्शनाखाली ग्राहकांना मीटर देऊन वीजपुरवठा सुरू करत आहेत. त्यामुळे ग्राहकांना वीज जोडणीसाठी हेलपाटे मारावे लागणार नाहीत.
श्रीवर्धन तालुक्यातील वाळवटी येथील श्रीवर्धन ग्रामीण उपविभाग शाखेअंतर्गत पुनिर, गुळधे येथील अर्ज केलेल्या ग्राहकांना २४ तासांत नवीन वीजजोडणी करून मिळाली आहे. विजय खोपटकर व गुलाब म्हसकर यांनी पहिल्यांदाच वीजजोडणीसाठी अर्ज केला होता. एक ते दीड महिने वीजजोडणी मिळणार नाही, असा त्यांचा समज होता; पण त्या ग्राहकांना एका दिवसातच जोडणी मिळाली. कार्यकारी अभियंता सी. एस. केंद्रे आणि उपकार्यकारी अभियंता वि. जे. बोरसे यांच्या मार्गदर्शनाखाली ही मोहीम राबवत असल्याचे घुगे यांनी सांगितले. घुगे हे नव्याने बदली होऊन श्रीवर्धन तालुक्यात रुजू झाले आहेत. नवीन जोडणीसाठी www.mahadiscom.in हे संकेतस्थळ आणि मोबाइल अॅपद्वारेही अर्ज स्वीकारणे सुरू आहे. महावितरणने वीजजोडणी देण्याची अंतर्गत कार्यवाही संपूर्णपणे ऑनलाइन करणे अधिकारी व कर्मचाऱ्यांसाठी अनिवार्य केलेले आहे.

जर कुणाला ऑनलाईन अर्ज करण्यास अडचणी येत असल्यास आमचे कर्मचारी मदत करतात. जेणेकरून ग्राहकांना लगेच मीटर व वीजजोडणी देण्यात येईल.
- डी. बी. घुगे, महावितरण कनिष्ठ अभियंता, श्रीवर्धन

आवश्यक कागदपत्रे
* घर जागेचा उतारा किंवा सातबारा
* आधार कार्ड किंवा पॅन कार्ड
* महावितरणचा ए-वन अर्ज
* मीटर शुल्क

श्रीवर्धन : गुलाब म्हसकर यांना २४ तासांत मीटर जोडणी देऊन वीजपुरवठा सुरू केला.