पेसा अंतर्गत शिक्षक भरतीसाठी ७७३ उमेदवार पात्र

पालघर, ता. २० (बातमीदार) : पालघर जिल्हा परिषदेतील प्राथमिक शिक्षकांच्या रिक्त जागेसाठी ‘पेसा’ अंतर्गत दोन हजार १९४ रिक्त पदांपैकी १ हजार तीनशे अठरा पदे भरण्यास शासनाने परवानगी दिली आहे. त्यानुसार जिल्ह्यातील स्थानिक आदिवासी ‘पेसा’ क्षेत्रातील परीक्षा दिलेल्या २,५५६ उमेदवारांची कागदपत्रे पडताळणीनंतर ७७३ उमेदवार पात्र ठरले आहेत. उमेदवारांची ही अंतिम यादी जिल्हा परिषदेच्या संकेतस्थळावरून प्रसिद्ध करण्यात आली आहे.
प्रसिद्ध केलेल्या यादीतील उमेदवाराला हरकतीसाठी तीन दिवसांची मुदत देण्यात आली असून या संदर्भातील प्राप्त हरकती तपासून अंतिम यादी प्रसिद्धी केली जाणार आहे. ‘पेसा’ मध्ये नकारात्मक प्रतिसाद नोंदवणाऱ्या उमेदवारांची माहिती मुख्य कार्यकारी अधिकारी भानुदास पालवे यांची मान्यता घेऊन पुणे येथे शिक्षण आयुक्त कार्यालयास सादर करण्यात येणार आहे. या भरती संदर्भातील प्रक्रिया पारदर्शकपणे राबवली जात असून शासनाच्या मार्गदर्शक सूचनांनुसार कार्यवाही सुरू आहे. उमेदवारांना मार्गदर्शन करण्यासाठी स्वतंत्र ‘पेसा’ कक्ष सुरू करण्यात आला आहे. शिक्षकांची यादी जिल्हा परिषदेच्या संकेतस्थळावर प्रसिद्ध होणार असल्याने उमेदवारांना जिल्हा परिषदेत येण्याची गरज भासणार नाही. तसेच अपात्र उमेदवारांची अपात्र होण्याची कारणे यादीत नमूद असतील, तसेच त्रुटी पूर्ततेसाठी तीन कार्यालयीन दिवस वेळ देण्यात येणार आहे, असे शिक्षणाधिकारी प्राथमिक विभाग शेषराव बडे यांनी सांगितले.