रिक्षा चालकाने व त्याच्या साथीदाराने महिलेच्या गळ्यातील पाऊण लाख रुपये किंमतीचे दागिने लुटले

रिक्षाचालकाने महिलेला लुटले

नवी मुंबई, ता. १३ (वार्ताहर) : कामोठे येथून रिक्षाने वाशी येथे जात असलेल्या एका महिलेला रिक्षाचालकाने व त्याच्या साथीदाराने रिक्षात सीएनजी भरण्याच्या बहाण्याने सीबीडीतील पारसिक हिलवर निर्जनस्थळी नेले. तेथे महिलेच्या गळ्यातील पाऊण लाख रुपये किमतीची सोन्याची चेन लुटून दोघांनी पलायन केल्याची घटना उघडकीस आली आहे. सीबीडी पोलिसांनी या घटनेतील रिक्षाचालक व त्याचा साथीदार यांच्याविरोधात जबरी चोरीचा गुन्हा दाखल केला आहे.

कामोठे येथे राहणाऱ्या नियती पोमेंडकर (वय ४७) या १० ऑक्टोबरला वाशी येथे कामानिमित्त जात होत्या. त्यांनी दुपारी दीडच्या सुमारास कामोठे येथून रिक्षा पकडली होती. या रिक्षात एक प्रवासी पूर्वीपासून बसला होता. वाशीच्या दिशेने जात असताना रिक्षाचालकाने पाठीमागे बसलेल्या आपल्या साथीदाराला रिक्षातील सीएनजी संपल्याचा बहाणा करून पंपाबाबत विचारपूस केली. त्याने सांगितल्याप्रमाणे रिक्षा पारसिक हिलवर नेली. पोमेंडकर यांना शंका आल्याने त्यांनी कुठे घेऊन जात आहे, अशी विचारणा रिक्षाचालकाला केली. त्यानंतर चालकाने रस्त्यामध्ये रिक्षा थांबवली आणि पाठीमागे बसलेल्या त्याच्या साथीदाराने पोमेंडकर यांच्या गळ्यातील १३ ग्रॅम वजनाची ७६ हजार ७०० रुपये किमतीची सोन्याची चेन खेचून पारसिक हिल येथील झुडपात पलायन केले. त्यानंतर रिक्षाचालकानेही पोमेंडकर यांना एकटीला सोडून पलायन केले. पोमेंडकर यांनी गुरुवारी वडिलांसह सीबीडी पोलिस ठाणे गाठून तक्रार दाखल केली आहे.