संत साहित्य आजही टिकून, कीर्तनकारांमुळे महाराष्ट्रात श्रवणाची परंपरा

विरार, ता. २४ (बातमीदार) : संत ब्रह्मनिष्ठ होते. ते ज्ञानी होते आणि कृपाळू देखील होते. म्हणून संत साहित्य आजही टिकून आहे. महाराष्ट्रातील वेगवेगळ्या पंथांच्या कीर्तन परंपरेने संतांचा विचार तळागाळात नेऊन आपली आध्यात्मिक जडणघडण केली. कीर्तन परंपरेने या राज्यात ऐकण्याची परंपरा निर्माण केली. ज्यांच्या कानावर शब्द पडले, ज्यांनी ते ग्रहण केले, त्यांचे आयुष्य बदलले. करमणुकीच्या साधनांचा अतिरेक झालेला असतानाही माणसे आज कीर्तनासाठी एकत्र येतात, ही आशादायक घटना आहे, असे उद्‍गार‍ डॉ. भावार्थ देखणे यांनी काढले.

भुईगाव येथे चंपावती मंदिर न्यास आयोजित कीर्तन रंग सोहळा आयोजित करण्यात आला होता. त्या वेळी ते बोलत होते. शारदीय नवरात्रोत्सवानिमित्ताने राज्यभरातील प्रख्यात कीर्तनकार भुईगावात येऊन आपली सेवा देत आहेत. या संपूर्ण कार्यक्रमाचे नियोजन गावातील तरुण करत आहेत, ही आनंदाची बाब आहे, असे कार्यक्रमाचे मुख्य संयोजक नारायण नाईक म्हणाले. कवी सायमन मार्टिन यांच्या हस्ते डॉ. भावार्थ देखणे यांचा ग्रामस्थांच्या वतीने सन्मान करण्यात आला. याच सप्ताहात हरिबुवा नातू व मोहक बुवा रायकर यांनी संत वाङ्मयाची फलश्रुती या विषयावर निरूपण केले.