आझाद मैदानावर शेतकरी आणि कामगारांचा यल्गार

मुंबादेवी, ता. २८ (बातमीदार) : कामगारविरोधी धोरणे राबवून कामगारांचे‌ खच्चीकरण करणाऱ्या केंद्रातील नरेंद्र मोदी सरकारला‌ सत्तेवरून खाली खेचण्याची मागणी करत मंगळवारी आझाद मैदानात सामाजिक संघटना शेतकरी, कामगार संघटना संयुक्त कृती संघटनेच्या इशारा मोर्चा आयोजित करण्यात आला होता. या वेळी मोदी सरकारच्या कामगारविरोधी धोरणावर टीका करण्यात आली. या इशारा मोर्चाला इंटकप्रणित सर्व कामगार वर्गाने मोठ्या संख्येने सहभागी होत आपला आक्रोश व्यक्त केला. महाराष्ट्र इंटकचे अध्यक्ष डॉ. कैलास कदम आणि सरचिटणीस गोविंदराव मोहिते, नर्मदा बचाव आंदोलनाच्या नेत्या मेधा पाटकर आणि अन्य मान्यवर उपस्थित होते. २०२४ च्या लोकसभा निवडणुकीत नरेंद्र मोदी यांचे सरकार पुन्हा निवडून आले; तर कामगारांची समस्या आणखीनच बिकट होईल, असे इंटक नेते गोविंदराव मोहिते यांनी या वेळी सांगितले. आज महाराष्ट्र राज्यात अवकाळी पावसामुळे शेतकरी वर्गाचे प्रचंड मोठे नुकसान झाले असून राज्य आणि केंद्र सरकारच्या अधिकाऱ्यांनी शेतकऱ्यांच्या बांधावर जाऊन पंचनामे करून शेतकऱ्यांना तात्काळ नुकसान भरपाई द्यावी, अशी मागणी गोविंदराव मोहिते यांनी केली.