बांदोडकर महाविद्यालयात भव्य परेड स्पर्धा पार पडली

ठाणे, ता. ११ (बातमीदार) : माजी एन.सी.सी. कॅडेट आणि ए.एस. सी. ठाणे युनिटतर्फे बा. ना. बांदोडकर विज्ञान महाविद्यालयात भव्य परेड संचलन स्पर्धा ९ डिसेंबर रोजी उत्साहात पार पडली. स्पर्धेमध्ये ठाणे, मुंबई, पुणे, रायगड जिल्ह्यातील शाळांमधील एन.सी.सी आणि मिलिटरी स्कूलच्या विद्यार्थ्यांनी सहभाग नोंदवला. यावेळी मुलांना भावी वाटचालीसाठी सैन्य भरतीचे मार्गदर्शन सुहास पाटील (निवृत्त सहायक आयुक्त) यांनी केले.
स्पर्धेची सुरुवातीला महाविद्यालयाच्या प्राचार्या डॉ. विंदा मांजरमकर यांच्या स्पर्धकांना शुभेच्छा दिल्या. या स्पर्धेचे निरीक्षण करण्यासाठी तसेच परीक्षणासाठी वन महाराष्ट्र बटालियन आर्मी विंगचे तीन अधिकारी उपस्थित होते. स्पर्धेतील प्रथम पारितोषिक पुण्यातील ऑफिसर करियर अकॅडमी पुणे यांनी पटकावले. चषक आणि रोख रक्कम असे या पारितोषिकाचे स्वरूप होते. तसेच द्वितीय पारितोषिक दत्त मेघे सैनिक स्कूल, तृतीय पारितोषिक सरस्वती महाविद्यालयाने पटकाले. या स्पर्धेतील उत्कृष्ट परेड कमांडर म्हणून सरस्वती महाविद्यालयाच्या कॅडेट धनश्री हटकर हीचा गौरव करण्यात आला. स्पर्धेस माजी एन.सी.सी. कॅडेट तसेच वरिष्ठ पोलिस निरीक्षक राजू पाटील, सर्व शाळांतील विद्यार्थी, शिक्षक तसेच पालक उपस्थित होते.
….
ठाणे : बा. ना. बांदोडकर विज्ञान महाविद्यालयात परेड संचलन स्पर्धा पार पडली.