Crime: सायबर ठगाकडून पोलिस निरीक्षकाची फसवणूक

खेरवाडी पोलिस ठाण्याच्या एका पोलिस निरीक्षकाची अज्ञात सायबर ठगाने पाच लाखांची ऑनलाईन फसवणूक केली. याप्रकरणी पोलिसांनी फसवणुकीसह आयटी कलमांतर्गत गुन्हा नोंदवून सायबर ठगाचा शोध सुरू केला आहे.

तक्रारदार पोलिस निरीक्षक असून ते सध्या खेरवाडी पोलिस ठाण्यात कार्यरत आहेत. दोन दिवसांपूर्वी त्यांना एका अज्ञात व्यक्तीने फोन करून केवायसी अपडेट करण्यास सांगितले. तसे केले नाहीतर त्यांची दोन्ही बँक खाती ब्लॉक होतील, असे या ठगाने सांगितले होते. त्यामुळे अकाऊंट ब्लॉक होऊ नये म्हणून त्याने पाठविलेल्या लिंकवर त्यांनी माहिती भरली होती. त्यानंतर त्याने दिलेल्या कस्टमर केअर क्रमांकावर संपर्क साधण्याचा प्रयत्न केला. मात्र त्यांचा संपर्क होऊ शकला नाही.

त्यानंतर त्यांनी त्याच्याशी व्हिडीओ कॉलवरून केवाययी अपडेटविषयी माहिती जाणून घेण्याचा प्रयत्न केला. याच दरम्यान त्यांच्या मोबाईलवर दोन ते तीन ओटीपी क्रमांक आले होते. काही वेळानंतर त्यांच्या बँक खात्यातून दोन ऑनलाईन व्यवहार होऊन सुमारे पाच लाख रुपये काढण्यात आले. त्यानंतर बँकेत जाऊन त्यांनी त्यांची दोन्ही बँक खाती ब्लॉक केली. या प्रकारानंतर त्यांनी नॅशनल सायबर पोर्टलवर आणि खेरवाडी पोलिसांत लेखी अर्जाद्वारे तक्रार केली.