डहाणू तालुक्यात पुन्हा बसले भूकंपाचे धक्के; नागरिकांमध्ये भीतीचे वातावरण

डहाणू तालुक्यात शुक्रवारी (ता. ५) पुन्हा भूकंपाचा धक्का बसला. गेल्या तीन दिवसांत हा दुसरा धक्का जाणवला आहे. त्याचा केंद्रबिंदू अरबी समुद्रात असल्याचे सांगण्यात येते. नवीन वर्षात हिवाळा सुरू झाल्यावर पुन्हा हे धक्के जाणवू लागल्याने पुन्हा नागरिकांमध्ये घबराटीचे वातावरण पसरले आहे.

डहाणू, तलासरी, धुंदलवाडी, मोडगाव, चारोटी, कासा, गुजरातमधील उंबरगाव, वापी, तसेच जव्हार परिसरातील गावांना हा धक्का जाणवला. गेल्या सहा महिन्यांपासून हे धक्के बंद होते. त्यामुळे नागरिक निर्धास्त होते. पुन्हा या परिसरात घबराटीचे वातावरण पसरले आहे. बुधवारी (ता. ३) दुपारी १.४७ वाजता ३.४ रिश्टर स्केलचा भूकंपाचा धक्का होता. मात्र शुक्रवारी रात्री ९.५३ वाजता ४.१ रिश्टर स्केलचा धक्का बसल्याने पुन्हा परिसरात घबराट निर्माण झाली आहे. यामुळे गेल्या अनेक महिन्यांपासून थांबलेले भूकंपाचे सत्र पुन्हा सुरू झाले आहे. मात्र आता हिवाळा सुरू झाल्याने नागरिकांना रात्री बाहेर राहता देखील येत नाही.

या धक्क्यामुळे अजून कोणत्याही नुकसान, हानीची माहिती अजून समोर आली नाही. महसूल अधिकारी व कर्मचाऱ्यांना सतर्क राहण्याचे आदेश दिले आहेत. नागरिकांनी देखील काळजी घ्यावी, असे आवाहन डहाणू तहसीलदार अभिजित देशमुख यांनी दिली आहे.