उरणमधील शाळेत विद्यार्थ्यांना आसाराम बापूच्या पुस्तकांचे वाटप

सकाळ वृत्तसेवा
नवी मुंबई, ता. ६ : उरण शहरातील एका शाळेत बलात्काराच्या गुन्ह्यात शिक्षा भोगत असलेल्या आसाराम बापूची पुस्तके वाटल्याचा धक्कादायक प्रकार समोर आला आहे. विद्यार्थ्याच्या पालकाने तक्रार केल्यानंतर ही गंभीर बाब उघडकीस आली.
बलात्काराच्या गुन्ह्यासाठी आजन्म कारावास भोगत असलेल्या आसाराम बापूचे ‘संस्कार सरिता’ नावाचे पुस्तक उरण येथील शाळेच्या पूर्व प्राथमिक शाळेतील विद्यार्थ्यांना वाटल्याची घटना समोर आली आहे. या पुस्तकावर आधारित परीक्षा घेणार असल्याच समजते. शाळेतील काही विद्यार्थ्यांना आसाराम बापूचे ‘संस्कार सरिता’ हे पुस्तक देण्यात आले होते आणि त्यावर आधारित इयत्ता तिसरी ते इयत्ता आठवीच्या विद्यार्थ्यांची परीक्षा घेण्यात येणार होती.
यासाठी तीन वयोगट ठरविण्यात आले होते. जो विद्यार्थी ६० टक्के प्राप्त करेल, त्याची जिल्हास्तरीय निवड होणार असल्याचे सांगण्यात आले होते. जिल्हास्तरीय टॉपमध्ये सहा विद्यार्थ्यांची निवड करून प्रथम येणाऱ्या विद्यार्थ्याला २१ हजार, द्वितीय १५ हजार, तृतीय ११ हजार, चतुर्थ सात हजार, पाचव्या क्रमांकास पाच हजार, सहाव्या क्रमांकास ३ हजार अशी पुरस्कारांसाठीची रक्कम ठरवलेली होती. या प्रकरणी काही पालकांनी शाळेच्या मुख्याध्यापिकेकडे तक्रार केल्यानंतर ही बाब उघडकीस आली.