Mumbai Local Crime: हार्बर रेल्वे मार्गावर चोऱ्या वाढल्या; प्रवाशांच्या सुरक्षेचं काय?

Mumbai Local Crime: हार्बर रेल्वे मार्गावर मोबाईल खेचण्याचे प्रकार सुरूच आहेत. तीन दिवसांमध्ये दोन प्रवाशांचे महागडे मोबाईल खेचून पलायन केल्याचे प्रकार झाल्याने प्रवाशांमध्ये दहशतीचे वातावरण आहे. रेल्वे पोलिस मात्र चोरांना पकडण्याऐेवजी फक्त चोरीचे गुन्हे दाखल करण्याचे सोपस्कर पार पाडत आहेत.

तुर्भे स्टोअर्स येथे राहणारा सूरज गुप्ता (२०) नेरूळमध्ये कुकीज डिलिव्हरीचे काम करतो. काही दिवसांपूर्वी काम संपवून रात्री सव्वा नऊच्या सुमारास तुर्भे स्टोअर्स येथील घरी जाण्यासाठी त्याने नेरूळ स्थानकातून ठाणे लोकल पकडली होती. यावेळी ठाण्याच्या दिशेने निघालेली ट्रेन फलाटावर असतानाच एका लुटारूने सूरजच्या हातातील महागडा मोबाईल खेचून पलायन केले होते. यावेळी गाडीने वेग घेतल्याने सूरजला लोकलमधून खाली उतरता आले नाही.

त्यानंतर तुर्भे सेक्टर-२२ मध्ये राहणारी पूजा शर्मा (२५) या तरुणीचा सोमवारी (ता. २९) सायंकाळी ३.३० च्या सुमारास सीवूड्स येथून सानपाड्याला जाताना पनवेल लोकलच्या जनरल डब्यात एका लुटारूने हातातील किमती मोबाईल खेचून पलायन केले होते. नेरूळ रेल्वेस्थानकातून ठाणे येथे जाणाऱ्या अंकुश वीर याच्या हातातील मोबाईल खेचण्यात आला आहे, या तीनही प्रकरणाची नोंद रेल्वे पोलिसांनी केली आहे. अद्याप कोणालाही अटक नसल्याने प्रवाशांमध्ये भीती आहे.