थकीत मालमत्ता कर वसुलीसाठी पाणी जोडणी खंडित

थकीत मालमत्ता कर वसुलीसाठी पाणी जोडणी खंडित
नवी मुंबई महापालिकेची कठोर पावले; रेन्बो बिझनेस पार्कवर कारवाई
नवी मुंबई, ता. ७ (वार्ताहर) : थकीत मालमत्ता कराच्या वसुलीसाठी नवी मुंबई महापालिकेच्या मालमत्ता कर विभागाने थकबाकीदारांच्या मालमत्ता सील करणे व पाणीपुरवठा खंडित करण्याच्या कारवाईला गती दिली आहे. एक लाख ६८ हजार ३१६ रुपये थकीत मालमत्ता कराच्या वसुलीसाठी मालमत्ता कर विभागाने तुर्भे येथील रेन्बो बिझनेस पार्कमधील मालमत्तांना सील ठोकण्यासोबतच पाणी जोडणी खंडित करण्याची कारवाई केली आहे.
यंदाच्‍या चालू आर्थिक वर्षात महापालिकेच्या मालमत्ता कर विभागास ८०० कोटी रुपये मालमत्ता कर वसुलीचे उद्दिष्ट देण्यात आले आहे. त्याकरिता मालमत्ता कर विभागाने हजारो थकबाकीदारांना थकीत कराचा भरणा करण्यासाठी नोटिसा बजावून कराची रक्कम न भरल्यास मालमत्ता सील करण्याच्या व पाणी जोडणी खंडित करण्यासारख्या कारवाईला सामोरे जावे लागेल, असा कडक इशारा देण्यात आला आहे. मात्र तरीदेखील अनेक मालमत्ताधारकांचे लाखो रुपयांचे कर थकीत आहे. त्‍या अनुषंगाने नवी मुंबई महापालिकेच्या मालमत्ता कर विभागातील अधिकारी-कर्मचाऱ्यांनी बुधवारी तुर्भे सेक्टर-२४ येथील रेन्बो बिझनेस पार्कमधील युनिट क्र. ०२१४ व ०२१५ या दोन्ही मालमत्ताधारकांकडून कराचा भरणा न झाल्याने प्रत्येकी ८४ हजार १५८ रुपयांची थकबाकी वसूल करण्यासाठी त्यांच्यावर पाणी जोडणी खंडित करण्याची कारवाई केली. अशाप्रकारे इतर थकबाकीदारांवर कारवाई होण्याआधीच संबंधितांनी थकीत कराचा भरणा महापालिकेकडे करावा, असे आवाहन नवी मुंबई महापालिकेच्या मालमत्ता कर विभागाच्या अतिरिक्त आयुक्त सुजाता ढोले यांनी केले आहे.