नवी मुंबईत महाशिवरात्री उत्‍साहात

थोडक्‍यात नवी मुंबई
नवी मुंबईत महाशिवरात्री उत्‍साहात
वाशी (बातमीदार) : महाशिवरात्रीनिमित्त नवी मुंबईतील महादेवाच्या मंदिरामध्ये शिवभक्तांची दर्शनासाठी गर्दी जमली होती. यावेळी महादेवाच्या मंदिरामध्ये धार्मिक कार्यक्रमांचे आयोजन करण्यात आले होते. मंदिरामध्ये पहाटे शिवलिंगावर पंचामृतांनी अभिषेक त्यानंतर सर्व भक्तांनी बेल, पांढऱ्या रंगाची फुले वाहून शिवलिगांची पूजा केली. तर भजन आणि कीर्तनाने नवी मुंबई दुमदुमून गेली. आनंद नगर येथील शंकर मंदिर, वाशी येथील पुरातन जागृतेश्वर मंदिर, सानपाडामधील शिवमंदिर, पाचबीच येथील बुद्धेश्वर मंदिर, घणसोली गावातील शिवमंदिर, महावितरण वसाहतीमधील शिवमंदिर, दिघा येथील शिव मंदिर आदी महादेवाच्या मंदिरामध्ये भाविकांची सकाळपासूनच दर्शनासाठी गर्दी जमली होती. आनंद नगर येथे हरिनाम सप्ताहाचा जागर करण्यात आला होता. महाशिवरात्री उत्सवाला गालबोट लागू नये, यासाठी पोलिस बंदोबस्तदेखील ठेवण्यात आला होता.
.....................
ऐरोलीत महिलांचा सन्मान
वाशी (बातमीदार) : शिवसेना ऐरोली विधानसभेच्या माध्यमातून शिवसेना जिल्हाप्रमुख विजय चौगुले यांच्या वतीने जागतिक महिला दिनाच्या निमित्ताने ऐरोली सेक्टर १९ येथील सुनील चौगुले स्पोर्ट्स असोसिएशन मैदानामध्ये महिला सन्मान सोहळ्याचे आयोजन करण्यात आले होते. या मेळाव्यामध्ये सामाजिक, राजकीय, सांस्कृतिक, आर्थिक, कला व शैक्षणिक क्षेत्रात उल्लेखनीय कार्य केलेल्या महिलांचा शिवसेना जिल्हाप्रमुख विजय चौगुले, राधिकाबाई मेघे विद्यालयाच्या माजी मुख्याध्यापिका क्रांती प्रसाद, घणसोली येथील शेतकरी शाळेच्या माजी शिक्षिका अंजली पाटील यांच्या हस्ते सन्‍मानित करण्यात आले. यावेळी रबाळे पोलिस ठाण्याच्या स्मिता पवार, ॲड. स्वाती फडतरे आदी मान्यवर उपस्थित होत्या. यावेळी शिवसेनेचे जिल्हाप्रमुख विजय चौगुले यांनी महिलांनी आपले ध्येय ठरवावे व त्यादृष्टीने वाटचाल करावी, असे आवाहन केले. तर ज्या मुलांना पित्याचे छत्र नसते. अशा मुलांना प्रोत्साहन देऊन मदतीचा हात देत असल्याचेदेखील चौगुले म्हणाले. यावेळी राधिकाबाई मेघेच्या माजी मुख्याध्यापिका क्रांती प्रसाद म्हणाल्या की, महिलांसाठी चूल आणि मूल एवढेच होते; पण आता परिवर्तन झाले असून कॉम्प्युटरचा जमाना आला असून त्या दिशेने महिलांनीदेखील पाऊल टाकणे गरजेचे आहे. दिवसातून एक तास तरी त्यासाठी महिलांनी वेळ देणे आवश्यक असल्याचे त्यांनी सांगितले.