अवाडा एनर्जीची ५० अब्ज रुपयांची गुंतवणूक

मुंबई, ता. १० : अवाडा एनर्जीतर्फे राज्यातील दहा जिल्ह्यांतल्या १९२ ठिकाणी ५० अब्ज रुपयांची गुंतवणूक केली जाणार आहे. कृषी सौर पी. व्ही. प्रकल्पांचे विकेंद्रीकरण करून त्यांचा विकास आणि कार्यसंचालन करणे हा याचा हेतू आहे. अवाडा ग्रुपच्या अवाडा एनर्जी या विभागाला महाराष्ट्र शासनाच्या एमएसईबी सोलर ॲग्रो पॉवर लिमिटेड या उपकंपनीने लेटर ऑफ अवॉर्ड दिले. यावेळी उपमुख्यमंत्री देवेंद्र फडणवीस यांची उपस्थिती होती.

लेटर ऑफ अवॉर्ड देताना उपमुख्यमंत्री देवेंद्र फडणवीस यांनी ग्रामीण समृद्धी आणि शाश्‍वत ऊर्जा यांचे महत्त्व विशद केले. याप्रसंगी अवाडा ग्रुपचे अध्यक्ष विनीत मित्तल उपस्थित होते. लेटर ऑफ अवॉर्ड दिल्यामुळे अवाडा एनर्जीला कामे करता येतील. कृषी सौर पीव्ही प्रकल्पांमुळे राज्यात १,१३८ मेगावॉट ऊर्जा उपलब्ध होईल. मुख्यमंत्री सौर कृषी वाहिनी योजना दोन किंवा मिशन २०२५ चा हा प्रकल्प एक भाग आहे. सन २०२५ पर्यंत तीस टक्के कृषी फीडरचे सौरऊर्जेत रूपांतर करण्याचे उद्दिष्ट यावेळी स्पष्ट करण्यात आले. महाराष्ट्रातील सुमारे तीन कोटी ग्राहकांपैकी ४५ लाख ग्राहक २२ टक्के वीज वापर करणाऱ्या कृषी क्षेत्रातील आहेत. अवाडा एनर्जीच्या या प्रकल्पामुळे सुमारे अडीच हजार प्रत्यक्ष आणि अप्रत्यक्ष रोजगार निर्मिती होईल.