Mumbai Police: 5 वर्षांच्या मुलीचे अपहरण करुन विक्री करण्याचा प्रयत्न; पोलिसांनी १२ तासात घेतला शोध

Mumbai News: पाच वर्षांच्या मुलीचे अपहरण करून तिची विक्री करण्याचा प्रयत्न करणाऱ्या महिलांच्या टोळीला भांडुप पोलिसांना १२ तासांत अटक करण्यात यश आले आहे.

खुशबू गुप्ता, मैना दिलोड, दिव्या सिंह आणि पायल सिंग अशी अटक केलेल्या महिलांची नावे आहेत. या टोळीने अपहरण केलेल्या मुलीची पोलिसांनी सुखरूप सुटका केली असून पोलिस याबाबत अधिक तपास करीत आहेत.

भांडुप परिसरात राहणारी पीडित मुलगी रविवारी रात्री परिसरातील एका दुकानात फुगे विकत घेण्यासाठी गेली होती. मात्र, बराच वेळ होऊनही मुलगी घरी परत न आल्याने तिच्या कुटुंबीयांनी तिचा शोध सुरू केला.

त्यादरम्यान परिसरातील एका महिलेसह मुलगी रिक्षातून गेल्याची माहिती एका स्थानिक महिलेने मुलीच्या आई-वडिलांना दिली. त्यानुसार मुलीच्या आई-वडिलांनी याबाबत भांडुप पोलिस ठाण्यात तक्रार दाखल केली. पोलिसांनीही तत्काळ गुन्ह्याची गंभीर दखल घेऊन अपहरणाचा गुन्हा दाखल केला आणि तपास सुरू केला.
----

मुलीला केले पालकांच्या स्वाधीन

तपासात परिसरातील आरोपी महिला खुशबू गुप्ता हिने मैना दिलोड हिच्या मदतीने मुलीचे अपहरण केल्याची माहिती पोलिसांना मिळाली. त्यानुसार पोलिसांनी त्या दोघींना ताब्यात घेतले. त्यांनी ठाणे परिसरात राहणाऱ्या दिव्या सिंह आणि पायल सिंग यांच्याकडे मुलीची विक्री केल्याचे सांगितले.

पोलिसांनी तत्काळ त्या दोघींचा शोध घेत ठाणे परिसरातून ताब्यात घेतले. या वेळी पोलिसांनी त्यांच्या ताब्यातून अपहरण झालेल्या मुलीची सुखरूप सुटका केली असून पोलिसांनी मुलीला तिच्या आई-वडिलांच्या ताब्यात दिले आहे.