कळव्यात रंगणार पालखी नृत्यस्पर्धा

कळवा, ता. ४ (बातमीदार) : गणेशोत्सवासह शिमगोत्सव हा कोकणी चाकरमान्यांचा अत्यंत जिव्हाळ्याचा सण होय. या सणासाठी ठाणे- मुंबईतील अनेक चाकरमानी आवर्जून गावी जात असतात; मात्र ज्यांना काही कारणांनी गावी जाणे शक्य नाही त्यांच्यासाठी संघर्ष या सेवाभावी संस्थेच्या वतीने कळवा येथेच शिमगोत्सवासह भव्य अशा पालखी नृत्य स्पर्धेचे आयोजन करण्यात आले आहे. रविवारी (ता. ७) दुपारी चार वाजता कळवा येथील भूमिपुत्र मैदानात हा कोकणचा शिमगोत्सव पारंपरिक प्रकारे साजरा करण्यात येणार आहे.

रत्नागिरीतील उक्षी या गावाची जागृत ग्रामदेवता देवी वाघजाई मातेची पालखी देवीचा कौल घेऊन आणण्यात येणार आहे. या पालखी उत्सवानिमित्त पालखी नृत्य स्पर्धेचेही आयोजन केले आहे. रत्नागिरी व रायगड या जिल्ह्यांतील अनेक नामवंत पालखी नृत्य संघ सहभागी होणार आहेत. या निमित्ताने कोकणातील पालखी उत्सव आणि देखाव्यांसह पारंपारिक पालखी नृत्य हे ठाणे-मुंबईकरांना अनुभवता येणार आहे. स्पर्धेतील प्रथम विजेत्या पालखी संघाला दोन लाख एक हजार रुपये व आकर्षक चषक; द्वितीय विजेत्याला एक लाख एकावन्न हजार रुपये व आकर्षक चषक; तृतीय विजेत्या संघाला एक लाख एक हजार रुपये व आकर्षक चषक देण्यात येणार आहे. सर्व सहभागी संघांना प्रत्येकी २५ हजारांचे उत्तेजनार्थ पारितोषिक व सन्मानचिन्ह देऊन गौरविण्यात येणार आहे.